QR Premer-Mınıstri belarýstik áriptesimen saýda-ekonomıkalyq baılanystardy talqylady
Taraptar ózara saýda-ekonomıkalyq baılanystardy, ónerkásiptik kooperatsııany, agroónerkásiptik keshendi, qurylys ındýstrııasyn odan ári damytýdyń birqatar ózekti máselelerin talqylady.
«Bizdiń elderimizdiń arasynda barlyq sala boıynsha ózara tıimdi yntymaqtastyqqa yqpal etetin senimdi dıalog jolǵa qoıylǵan. Qazaqstan-Belarýs qatynastarynyń negizgi ózegin saýda-ekonomıkalyq baılanystar qurap otyr», — dep atap ótti Á. Smaıylov.
2021 jyldyń qorytyndysy boıynsha ekijaqty taýar aınalymynyń ósimi 15,7%-dy qurady.
QR Premer-Mınıstri atap ótkendeı, bul kórsetkishter eki eldiń áleýetin tolyǵymen kórsetip otyrǵan joq, ózara saýdanyń turaqty ósýin qamtamasyz etý úshin birlesken kúsh-jiger jumsaý qajet.
Yntymaqtastyqtyń basym baǵyttarynyń biri – agroónerkásiptik keshen. Ózara saýda kólemin AÓK ónimderi arqyly birlesip ulǵaıtýdyń mańyzy zor. Qazaqstandyq tarap birlesken jumys úshin eń qolaıly jaǵdaılardy jasaýǵa daıyn.
Sonymen qatar Qazaqstan men Belarýstiń ónerkásiptik kooperatsııasynyń negizgi baǵyttarynyń biri – mashına jasaý. Múmkindikterdi eskere otyryp, qazaqstandyq tarap óndiristi barynsha jergiliktendirýge múddeli.
Óz kezeginde Belarýs Respýblıkasynyń Premer-Mınıstri R. Golovchenko Qazaqstanmen aradaǵy yntymaqtastyqtyń barlyq kezeńinde eshqashan kúrdeli sátter oryn almaǵanyn atap ótti.
«Eki el arasynda eshqandaı qarama-qaıshylyqtar, sheshilmegen máseleler joq, biz tyǵyz yntymaqtastyqta jumys isteımiz jáne ustanymdarymyz ortaq. Biz mańyzdy saýda-ekonomıkalyq áriptespiz. Máselen, 2021 jyldyń qorytyndysy boıynsha eki el arasyndaǵy taýar aınalymy alǵash ret mıllıardtyq kórsetkishten asty. Eki el Úkimetteriniń jáne bıznes-ortalarynyń qarqyndy jumysynyń nátıjesinde osyndaı jetistikterge qol jetkizdik», — dedi R. Golovchenko.
