QR Premer-Mınıstri: Baıan Ólgeıdegi selden zardap shekkenderge qarjylaı kómek kórsetemiz - VIDEO

ASTANA. QazAqparat - Mońǵolııaǵa barǵan QR Premer-Mınıstri Kárim Másimov Ólgeı qalasyna baryp, qazaq dıasporasynyń ókilderimen kezdesti, dep habarlaıdy Pm.kz.

Esterińizge salsaq, QR Premer-Mınıstri 15 shilde kúni Ulan-Batyr qalasynda ótetin XI ASEM sammıtine qatysý úshin Mońǵolııaǵa barǵan bolatyn.

Aıtar bolsaq, Ólgeı qalasy ornalasqan oblys halqynyń basym bóligin qazaq dıasporasy quraıtynyn atap ótken jón. Munda barlyǵy 90 myń adam tursa, onyń 88,7% bóligin qazaqtar quraıdy.

Jergilikti turǵyndardyń aıtýynsha, Mońǵolııa basshylyǵy dıaspora máselelerine erekshe kóńil bóledi.

Búgingi tańda oblysta  43 orta mektep bar, onda 1-4 synyptar aralyǵynda oqýshylar qazaq tilinde, al 5-11 synyptar aralyǵynda mońǵol tilinde oqytylady.

Sonymen qatar qalada qazaq tilindegi «Jańa ómir» gazeti jaryq kóredi.

Kárim Másimov Qazaqstan Respýblıkasynyń Prezıdenti Nursultan Nazarbaevtyń tapsyrmasymen Úkimet Ólgeı qalasyndaǵy selden zardap shekken otbasylarǵa qarjylaı kómek kórsetetinin atap ótti. 

Premer-Mınıstr jaqyn kúnderi kórsetiletin qoldaý qandastarymyzǵa tabıǵı apat saldaryn joıýǵa járdemdesedi degen úmitin bildirdi.

Eske salaıyq, Mońǵolııanyń Ólgeı qalasynda 10 shilde kúni sel júrip, saldarynan turǵyn úıler qırap, sý astynda qaldy.