QR Premer-Mınıstri astyq jınaý naýqany máselelerin baqylaýǵa alýdy tapsyrdy

Aýyl sharýashylyǵy vıtse-mınıstri Q. Aıtýǵanov Premer-Mınıstrge aımaqtardaǵy astyq jınaý naýqanynyń barysy jaıly baıandady, dep habarlaıdy pm.kz.

9 tamyzdaǵy jaǵdaı boıynsha Qazaqstannyń ońtústik jáne batys aımaqtaryndaǵy oblystarda (BQO, OQO, Aqtóbe, Almaty, Jambyl jáne Qyzylorda oblystarynda) 703,2 myń ga alqaptan 1 539,3 myń tonna astyq tartyldy. Astyq daqyldarynyń ortasha túsimdiligi bir gektardan 21,9 tsentnerdi qurady, bul aldyńǵy jyldardaǵy sáıkes kórsetkishterden 4,7 ts/ga artyq.

Q.Aıtýǵanov aıtyp ótkendeı, tamyz aıynyń basyna jalpy egis aýdany 5,1 mln ga bolatyn 2 567 AÓK sýbektilerinen 58,9 mlrd teńge somaǵa 1 853 ótinim qarjylandyryldy. Tehnıka men astyq qabyldaý pýnktteri jappaı astyq jınaýǵa jáne qabyldaýǵa daıyn.   

UEM statıstıkalyq málimetterine sáıkes 1 shildedegi jaǵdaı boıynsha respýblıkada 3,5 mln tonnadan astam astyq boldy, onyń ishinde azyq-túlik astyǵy - 3 mln tonna.

«Barlyǵy astyq jınaý naýqanyn baqylaýda ustaýy tıis. Qajet bolǵan jaǵdaıda keńes ótkizip, jumys toptaryn jınap, baıandańyzdar, qazir pisip jatqan áleýeti zor astyqty jınap, saqtap jáne tutynýshyǵa jetkizýimiz kerek», - dep basa aıtty Premer-Mınıstr.

Oblystyq aýyl sharýashylyǵy basqarmalarynyń málimetinshe, 2016 jyly barlyq aýyl sharýashylyǵy daqyldarynyń egis alqaptary 21,7 mln ga qurady, onyń ishinde dándi daqyldar - 15,2 mln ga, atap aıtqanda bıdaı - 12,2 mln ga. Maıly daqyldar 1,9 mln ga alqapqa, jemshóp - 4 mln ga, maqta - 109,3 myń ga, qant qyzylshasy - 12,1 myń ga, kartop jáne kókónis-baqsha daqyldary - sáıkesinshe 183,7 jáne 230 myń ga otyrǵyzyldy.

Sonymen qatar, 2015 jylmen salystyrǵanda bıdaıǵa arnalǵan alqaptar 441,4 myń ga-ǵa, dándi-burshaqty daqyldar - 26,3 myń ga-ǵa, maqta - 10,1 myń ga-ǵa, qant qyzylshasy - 2,7 myń ga-ǵa ulǵaıtyldy.