QR Premer-Mınıstri Almatyda «Saıran» turǵyn úı keshenindegi jumystardyń barysymen tanysty
LMATY. Naýryzdyń 23-i. QazAqparat /Danııar Sıqymbaev/ - Búgin QR Premer-Mınıstri Kárim Másimov Almatyǵa jumys sapary aýqymynda salynyp jatqan «Saıran» turǵyn úı kesheninde boldy. Úkimet basshysynyń qasyna Almaty qalasynyń ákimi Ahmetjan Esimov erip júrdi.
«Ótken jyldyń mamyr aıynda qol qoıylǵan memorandýmǵa sáıkes bizdiń kompanııa «Qýat» korporatsııasy bastaǵan jumysty osy nysanda jalǵastyryp jatyr. Bizge Almatyda alty turǵyn úı kesheni jáne Astanadaǵy «Grand Alataý» kesheni berildi», - dedi «Global bıldıng kontrakt» JShS dırektory Bolat Saýranbaev.
Kompanııa basshysy QR Úkimetiniń qaýlysymen 20 mlrd. teńge kólemindegi alǵashqy transh qazirdiń ózinde bólingenin atap ótti. «Sonyń arqasynda biz eki jyldyń ishinde 244 myń sharshymetr turǵyn úıdi paıdalanýǵa berýdi josparlap otyrmyz. Bul - 1296 páter. Onyń 1172-sin úleskerler alatyn bolady. 896 páter bıyl, qalǵany - kelesi jyly beriledi», - dep málim etti B.Saýranbaev. Ol «Qýat» korporatsııasynyń barlyq nysandary boıynsha saraptama júrgizilip, seısmıkalyq beriktigi tekserýden ótkenin atap kórsetti.
B.Saýranbaevtyń aıtýynsha, barlyq nysandarda 1896 úleskerler bar. Olardyń talaptaryn qanaǵattandyrý úshin taǵy 34 mlrd. teńge qarjy qajet.
