QR Premer-Mınıstri Almatyda ekologııalyq senbilikke qatysty
NUR-SULTAN. QazAqparat – QR Premer-Mınıstri Asqar Mamın Almatyǵa jumys sapary barysynda iri ınfraqurylym nysandarynyń qurylysymen tanysyp, Almaty qalasy men Almaty aglomeratsııasyn damytý máseleleri jóninde keńester ótkizdi, dep habarlaıdy primeminister.kz.
Almaty qalasyn damytý máseleleri jónindegi keńes barysynda qoljetimdi turǵyn úı jáne áleýmettik nysandar salý, jumyspen qamtý, kólik jáne jol ınfraqurylymyn, kásipkerlikti damytý, týrıstik áleýetti iske asyrý máseleleri talqylandy.
QR Premer-Mınıstri QR Tuńǵysh Prezıdenti – Elbasy N. Á. Nazarbaev Almaty qalasynyń damýyna úlken kóńil bóletinin atap ótti. QR Memleket basshysy Q. K. Toqaev qalalyq ınfraqurylymnyń sapasyn jaqsartý, qoǵamdyq qaýipsizdikti nyǵaıtý, kólik júıesin, medıtsına men bilim berýdi damytý jóninde naqty tapsyrmalar berdi.
Almaty qalasynyń ákimi B. Saǵyntaev, Almaty qalasy ákiminiń orynbasary І. Óserov qalany damytý jobalary týraly baıandady.
QR Premer-Mınıstri memlekettik organdarǵa qalanyń Qazaqstan ekonomıkasyndaǵy mańyzdylyǵyn atap ótip, Almaty qalasynyń damýyn baqylaýda ustaýdy tapsyrdy.
Osy kúni QR Úkimetiniń basshysy Almaty qalasynyń shetkeri aýdandary men Almaty oblysynyń irgeles aýmaǵyn damytý jóninde keńes ótkizdi.
2019 jyly QR Tuńǵysh Prezıdenti – Elbasy N. Á. Nazarbaevtyń tapsyrmasymen iri qalalardyń shetkeri aımaqtarynyń máselelerin jyl saıyn sheshýge 30 mlrd teńge, onyń ishinde Almaty qalasynyń shetkeri aımaqtaryna 10 mlrd teńge bólindi.
«Aglomeratsııa turǵyndarynyń turmys sapasyn jaqsartý jónindegi sharalardy júzege asyrý qala men oblystyń 730 myńnan astam turǵynyn tıisti ınfraqurylymmen qamtamasyz etýge múmkindik beredi», — dedi A. Mamın.
QR Premer-Mınıstri keńes qorytyndysy boıynsha qarjy jáne ulttyq ekonomıka mınıstrlikterine múddeli memlekettik organdarmen, Almaty q. jáne Almaty oblysynyń ákimdikterimen birlesip, qala mańyndaǵy aýdandardy, irgeles aýmaqtardy damytý boıynsha is-sharalardy ýaqytyly júzege asyrýdyń qajetti sharalaryn qabyldap, qarjylandyrý máselelerin pysyqtaýdy tapsyrdy.
«Biz Almaty q. men Almaty oblysynda birlesken jobalardy iske asyrýdan sınergetıkalyq nátıje alýymyz kerek. Ol úshin Almaty aglomeratsııasyn damytý baǵdarlamasyn ázirleý kerek», — dep A. Mamın, túrli baǵyttarda – energetıka, kólik, turǵyn úı, densaýlyq saqtaý salalaryn damytýda birlesken jobalardyń tizimi qurylǵanyn atap ótti.
QR Úkimetiniń basshysy qala men oblystaǵy halyq sanynyń ósýiniń joǵary qarqynyna baılanysty damýdyń ózekti máselelerin sheship, sol arqyly óńirdiń ınvestıtsııalyq tartymdylyǵyn arttyrý qajet ekenin atap ótti.
Asqar Mamın birlesken jobalardy iske asyrý jáne alǵa jyljytý úshin Almaty q. men Almaty oblysynyń jobalyq ofısin qurýdy tapsyrdy.
QR Úkimetiniń basshysy «Ýrbanıstıka ortalyǵy» men №405 avıa jóndeý zaýytynda bolyp, Almaty q. qurylysynyń jańa jobasymen, qalanyń qurylys ındýstrııasyn damytý josparlarymen tanysty, sondaı-aq, Qurylysshylar kúnine arnalǵan saltanatty jıynǵa qatysty.
Almaty qalasyna jumys sapary barysynda QR Premer-Mınıstri Aıýsaı shatqalyn tazartýǵa arnalǵan ekologııalyq senbilikke qatysty.
