QR Premer-Mınıstri Almaty halyqaralyq áýejaıynyń qaýipsizdik júıesin tekserdi
ALMATY. QazAqparat- Búgin Almatyǵa jumys saparymen kelgen QR Premer-Mınıstri Kárim Másimov halyqaralyq áýejaıdyń qaýipsizdik júıesin tekserdi.
Úkimet basshysyn Almaty qalasynyń ákimi Baýyrjan Baıbek, QR Energetıka mınıstri Qanat Bozymbaev, QR Aýyl sharýashylyǵy mınıstri Asqar Myrzahmetov, jergilikti jáne aýmaqtyq memlekettik organdardyń ókilderi, sondaı-aq basqa da joǵary qyzmettegi tulǵalar qarsy aldy.
Kárim Qajymqanuly aldymen Almaty halyqaralyq áýejaıynyń ushý alańy mańynda ornatylǵan arnaıy stendti kórdi. «Halyqaralyq Almaty áýejaıy» AQ prezıdenti Aıbol Bekmuhambetov Úkimet basshysyna áýejaıdyń ınjenerlik-tehnıkalyq jaǵdaıy jáne megapolıs áýe aılaǵynyń lańkestikke qarsy qaýipsizdigi týraly baıandady.
Sonymen qatar, Kárim Másimovti «Vokzal qyzmet» Ońtústik óńirlik fılıalynyń dırektory E. Shyntekov jáne «Halyqaralyq Saıran avtovokzaly» JShS basshysy E.Ábildaev kólik nysandarynyń qaýipsizdik júıesimen tanystyrdy.
Almaty halyqaralyq áýejaıy 1934 jyly paıdalanýǵa berilgen. Munda kún saıyn 180 ushaqty qabylaıdy jáne attandyrady. Orta eseppen 12 myń jolaýshyǵa qyzmet etedi.
