QR Premer-Mınıstri 2030 jylǵa deıingi zeınetaqy júıesin jańartý tujyrymdamasyn ázirleý jónindegi jumys tobyn qurýdy usyndy
ASTANA. 8 maýsym. QazAqparat - Búgin Úkimet úıinde QR Premer-Mınıstri Serik Ahmetov QR Prezıdentiniń 2013 jylǵy 7 maýsymdaǵy Úndeýinde aıtylǵan tapsyrmalardy júzege asyrý máseleleri boıynsha keńes ótkizdi.
Bul týraly QR Premer-Mınıstriniń baspasóz qyzmeti habarlady.
«Memleket basshysy áıelderdiń zeınet jasyn arttyrý týraly normany engizý merzimderi bóligin qaıtadan talqylap, daýysqa salý úshin Zań jobasyn Parlamentke qaıtardy. Prezıdent áıelderdiń zeınet jasyn 2014 jylǵy 1 qańtardan emes, 2018 jyldyń 1 qańtarynan kezeń-kezeńimen kóterýdi bastaýdy usyndy», - dedi S.Ahmetov.
S.Ahmetov Prezıdent Úkimetke jańa zańnama kúshine engenge deıin zańnamalyq súıemeldeý máseleleri boıynsha birqatar usynystardy pysyqtaýdy tapsyrdy. Atap aıtqanda, jumys jasaıtyn áıelder úshin bala týý jáne bala kútimi demalysy kezeńinde bıýdjet esebinen mindetti zeınetaqy jarnalaryn sýbsıdııalaýdy qamtamasyz etý qajet. Jınaqtaýshy zeınetaqy qorlaryna tólemderdiń jalpy mólsheri olardyń burynǵy burynǵy deńgeıinen 10 paıyzǵa deıin jetkiziledi. Jumys berýshilerden óz qyzmetkerleriniń paıdasyna qosymsha 5 paıyzdyq mindetti aýdarymdar jasaý engiziledi. Kásibı mindetti zeınetaqy jarnalarynyń mólsherlemeleri kezeń-kezeńimen taǵy da 5 paıyzǵa ulǵaıtylady.
Budan basqa Úkimetke 2030 jylǵa deıingi zeınetaqymen qamtamasyz etý júıesin odan ári jańartýdyń keshendi sharalaryn oılastyrý, sondaı-aq zeınetaqy aktıvterin ekonomıkanyń neǵurlym perspektıvaly salalaryndaǵy jobalarǵa tıimdi ınvestıtsııalaý tetikterin jasaý júkteldi.
«Memleket basshysynyń tapsyrmalaryn kidirtpeı oryndaýǵa kirisýge tıispiz», - dep atap kórsetti S.Ahmetov.
Osyǵan baılanysty ol Premer-Mınıstrdiń orynbasary Qaırat Kelimbetov basqarýymen usynystar men tıisti eseptemeler, sondaı-aq 2030 jylǵa deıingi zeınetaqymen qamtamasyz etý júıesin odan ári jańartý tujyrymdamasy jobasyn ázirleıtin jumys tobyn qurýdy tapsyrdy.
«Memleket basshysynyń tapsyrmasyna sáıkes tujyrymdamada memlekettiń, jumys berýshiniń jáne qyzmetkerdiń qazaqstandyqtardy áleýmettik qorǵaý deńgeıine yntymaqty jaýapkershiligi kózdelýi tıis», - dedi Premer-Mınıstr.
Eske sala ketetıik, 2013 jylǵy 7 maýsymda QR Prezıdenti Nursultan Nazarbaev zeınetaqy júıesin jańartý máseleleri jóninde Qazaqstan halqyna Úndeý joldady. Tolyǵyraq - myna jerde».
