QR PІB Medortalyǵy basshysynyń orynbasary sibir jarasynan saqtaný joldaryn túsindirdi

ASTANA. QazAqparat – Sońǵy apta ishinde elimizdiń keıbir óńirlerinde sibir jarasy taralyp, Aqmola oblysynda karantın jarııalaǵany belgili. QR PІB Medortalyǵy basshysynyń orynbasary Lıýdmıla Bıýrabekova osy qaterli derttiń belgileri, saqtaný joldary jaıly túsindirdi, dep habarlaıdy QazAqparat.

Sibir jarasy – adam men janýarlar úshin asa qaýipti ınfektsııa. Aýrý kóbinese terige áser etedi, keıde ishki organdardy da zaqymdaıdy.

Onyń bakterııalarynyń negizgi oshaǵy – topyraq, bakterııanyń qozdyrǵyshy topyraqta 70 jyldan astam ýaqyt saqtalyp, shóp arqyly aýylsharýashylyq janýarlaryna juǵýy múmkin.

«Sibir jarasy adamǵa aýrý maldyń eti jáne et ónimderi, qan, súıegi, terisi, júni arqyly juǵady. Sondaı-aq sý, topyraq, kóń, sibir jarasynyń sporalarymen lastanǵan óndiristik úı-jaılardaǵy aýa da ınfektsııa juqtyratyn faktor bolýy ábden múmkin», - deıdi QR PІB Medortalyǵy basshysynyń orynbasary Lıýdmıla Bıýrabekova.

Onyń aıtýynsha, qozdyrǵysh adamnyń terisine jáne sydyrylǵan jerlerge túsip, sibir jarasyn týdyrady. Infektsııa lastanǵan ónimdi tikeleı tutyný (ishek formasy) nemese mıkrobtarmen lastanǵan aýamen demalý (ókpe túri) kezinde juǵýy múmkin.

«Adamdarda klınıkalyq belgileri juqtyrǵan sátten bastap birneshe saǵat nemese 4-7 kún ishinde bastalady. Dene temperatýrasy 39-40 gradýsqa deıin kúrt joǵarylaıdy, denesinde jaraǵa jáne karbýnkýlǵa aınalatyn qyshyma, daq paıda bolady. Infektsııanyń alǵashqy belgileri paıda bolǵan kezde óz betinshe emdelýge bolmaıdy, dereý jaqyn jerdegi medıtsınalyq mekemege medıtsınalyq kómekke júginý kerek. Dárigerdiń kómegimen bul aýrýdan ádette tolyq emdelip shyǵýǵa bolady», - deıdi L.Bıýrabekova.

Sibir jarasynyń ınfektsııasynyń aldyn alý sharalary:

- mal baǵý jáne mal ónimderin tutyný kezinde jeke bas gıgıenasy erejelerin saqtaý;

- janýarlardyń ólekselerin óz betinshe joıýǵa bolmaıdy;

- sibir jarasynan ólgen maldyń ólekselerin órtep, olardan alynǵan azyq-túlik ónimderin joıý qajet;

- maldardyń aýrýǵa shaldyǵýy, májbúrlep soıýy nemese ólý jaǵdaıy týraly veterınarııaǵa habarlaý, vaktsınatsııadan keıin 14 kúnnen ótken soń ǵana (!) soıý;

- arnaıy veterınarııalyq baqylaýdan ótpegen jáne satýǵa tıisti ruqsaty joq ónimderdi kezdeısoq adamdardan satyp almaý kerek;

- Aýrý janýarlarmen nemese adamdarmen baılanysta bolǵan adamdar 2 apta boıy belsendi medıtsınalyq baqylaýǵa alynady.