QR PІB Medıtsına ortalyǵynyń mamandary Aqmola oblysyndaǵy aýrýhanada boldy
Bul týraly QazAqparat aýrýhananyń Facebook paraqshasyna silteme jasap habarlaıdy.
Komanda quramynda aýrýhana basshysy Ashat Bralov bastaǵan úzdik neırohırýrg, kardıolog, gastroenterolog, reanımatolog, nevropatolog, onkolog boldy. Olar konsýltatsııalar júrgizdi, ondaǵan naýqasqa operatsııalar jasady, bulardan basqa áriptesteri úshin «Júrektiń qabyný aýrýlaryn emdeýge arnalǵan zamanaýı tásilder», «Intrakranıaldyq bólimniń arterııalyq jáne kóktamyrlyq stenozdaryn emdeý boıynsha endovaskýlıarlyq qyzmetti uıymdastyrý», «Onkologııalyq naýqastarda hımıoterapııa júrgizý jáne ońaltý kezeńinde dıspepsııalyq asqynýlaryn emdeý boıynsha praktıkalyq usynymdar», «Ókpe arterııasynyń tromboembolııasyn dıagnostıkalaý, emdeý jáne aldyn alý», «Bas saqınasy – dıagnostıkalaýdaǵy jáne emdeýdegi zamanaýı tásilder», «Targentti aldyn alýdyń orny», «Ekstrakranıaldy maıda tamyrly anastomoz» taqyryptaryna dárister oqydy.
- Maǵan óte kóp naýqas keldi, óıtkeni qazirgi kezde nevropatologtar asa tanymal bolyp aldy, - dep áńgimeledi OKA joǵary sanatty nevropatology Gúlnara Iskanova,
- Kóbine adamdar omyrtqa, kúızelister, úreı shabýyldary, bas aýrýy sııaqty problemalarmen shaǵymdandy. Bul dertterdiń bárine muqııat qaraý kerek. Óıtkeni olar kúrdeli aýrýlardyń alǵashqy habarshylary bolýy múmkin. Únemi bolatyn bas aýrýyn aýyrsynýdy basatyn dárimen emdeýge bolmaıdy, asa naqty dıagnoz ben em qajet. Bul týraly men Kókshetaý aýrýhanalarynda aıttym, meniń kómegim ózgeris ákeledi degen oıdamyn».
Aldaǵy ýaqytta QR PІB Medıtsınalyq ortalyǵynyń kúnderi sheńberinde dárigerlerdi basqa óńirlerge saparlar kútip tur.
