QR PІB spartakıadasy: shaǵyn fýtboldan jarys ótti

ASTANA. KAZINFORM - Búgin elordada QR Prezıdenti Іs basqarmasy men oǵan qarasty kásiporyndardyń qyzmetkerleri dástúrli spartakıada aıasynda shaǵyn fýtboldan sheberlik baıqasty.

Medıtsınalyq ortalyq, Materıaldyq-tehnıkalyq qamtamasyz etý basqarmasy, Memlekettik rezıdentsııalar dırektsııasy, Ákimshilik ǵımarattar dırektsııasy, Avtosharýashylyq, Injenerlik-tehnıkalyq ortalyq, «Búrkit» avıakompanııasy, «Býrabaı-Damý» kásiporny, Qazqurylysjúıesi, QR Prezıdentiniń Teleradıokesheni jáne Іs Basqarmasynyń ortalyq apparaty qyzmetkerlerinen quralǵan komandalar báseke kórigin qyzdyrdy.

Týrnırdiń saltanatty ashylý rásiminde QR PІB uıymdastyrý-baqylaý jáne kadr jumysy bóliminiń meńgerýshisi Erbol Adaev sóz alyp, dástúrli spartakıada ujymdyq birliktiń nyǵaıa túsýine yqpal etip kele jatqanyn atap ótti, qatysýshylarǵa sáttilik tiledi.

Tartysqa toly toptyq kezeńde qarsylastarynan basym túsken Medortalyq, QR Prezıdenti Teleradıokesheni, Materıaldyq-tehnıkalyq qamtamasyz etý basqarmasy jáne byltyrǵy chempıon - Ákimshilik ǵımarattar dırektsııasy jyrtylaı fınalǵa shyqty.

Osy tórttiktiń ishinen sýyrylyp shyqqan Medortalyq pen Teleradıokeshen bas báıgege talasyp, nátıjesinde 1-0 esebimen alǵashqysynyń baǵy jandy.

Ákimshilik ǵımarattar dırektsııasy júldeli úshinshi orynǵa qol jetkizdi.

Sheberligimen kózge túsken jekeleı oıynshylar da nazardan tys qalǵan joq. Ákimshilik ǵımarattar dırektsııasynyń oıynshysy Arystan Ysqaqov «Úzdik shabýylshy» atansa, Medortalyq mamany Áskerbek Sádýaqasov «Úzdik qorǵaýshy», Teleradıokeshen qyzmetkeri Aıan Omarqulov «Úzdik qaqpashy» dep tanyldy.