QR PІB spartakıadasy: bılıard básekesiniń jeńimpazdary anyqtaldy
ASTANA. KAZINFORM – Elordada QR Prezıdenti Іs basqarmasynyń qyzmetkerleri dástúrli spartakıada aıasynda bılıardtan sheberlik baıqasty.
Jarysqa Medıtsınalyq ortalyq, Medortalyq aýrýhanasy, Materıaldyq-tehnıkalyq qamtamasyz etý basqarmasy, Memlekettik rezıdentsııalar dırektsııasy, Ákimshilik ǵımarattar dırektsııasy, Avtosharýashylyq, Injenerlik-tehnıkalyq ortalyq, «Búrkit» avıakompanııasy, QR Prezıdentiniń teleradıokesheni, Medtehnologııalar jáne aqparattyq júıeler ortalyǵy, «Astana-20» memlekettik qory, Prezıdenttik ortalyq, Qazqurylysjúıesi, «Býrabaı-Damý» jáne Іs Basqarmasynyń ortalyq apparaty qyzmetkerlerinen quralǵan 15 komanda qatysty.
Týrnırdiń saltanatty ashylý rásiminde QR PІB apparatynyń basshysy Serik Kenjebaev sóz alyp, dástúrli spartakıada ujymdyq birliktiń nyǵaıa túsýine yqpal etip kele jatqanyn atap ótti, qatysýshylarǵa sáttilik tiledi.
Tartysty tastaıaq saıysynda komandalar sapynda 3 oıynshy baq synady. Ár kezdesý saıyn jeńilis tapqan komanda jarys jolynan syrt qalyp otyrdy.
Týrnır bastalǵannan qarsylas shaq keltirmegen Іs Basqarmasyna qarasty Materıaldyq-tehnıkalyq qamtamasyz etý basqarmasy aqtyq kezeńge alqynbaı jetken-di. Fınalda da myqtylyǵyn kórsetip, bas báıgeni jeńip aldy.
Ekinshi oryn Medıtsınalyq ortalyq mamandarynan quralǵan komandaǵa buıyrdy. Ákimshilik ǵımarattar dırektsııasynyń ujymy júldeli úshinshi oryndy ıelendi.
Sheberligimen kózge túsken jekeleı oıynshylar da nazardan tys qalǵan joq. Qazqurylys júıesiniń sapynda óner kórsetken Torǵaı Nurǵazın týrnırdiń «Úzdik oıynshy» nomınatsııasyna laıyq dep tabyldy. Al «Býrabaı-Damý» kásipornynyń qyzmetkeri Janat Sadýov «Ádemi oıyn órnegi úshin» marapattaldy.
Jeńimpaz ben júldeger komandalarǵa, sondaı-aq sheber oıynshylarǵa tıisti dıplomdar men estelik syılyqtar tabystaldy.
