QR Parlamenti TMD keńistigindegi qaýipsizdikti nyǵaıtýǵa yqpal etetin qujatty qabyldady

NUR-SULTAN. QazAqparat – Parlament Senatynyń jalpy otyrysynda «Táýelsiz Memleketter Dostastyǵyna qatysýshy memleketter qarýly kúshteriniń birlesken baılanys júıesi týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

TMD-ǵa qatysýshy memleketter qarýly kúshteriniń birlesken baılanys júıesi týraly kelisim 2020 jylǵy 29 mamyrda jasaldy.

Onyń negizgi mindetteri:

- qarýly kúshter basqarý júıesinde jáne qarýly kúshter arasynda talap etiletin baılanys qyzmetterin usyný ári aqparattyń barlyq túrlerimen almasýdy qamtamasyz etý;

- Táýelsiz Memleketter Dostastyǵy formatynda qurylǵan áskerı saladaǵy ózara is-qımyldyń birikken júıeleriniń jumys isteýin qamtamasyz etý;

- baılanysqa, ortaq paıdalanylatyn ulttyq baılanys jelileri men arnaıy maqsattaǵy baılanys jelilerimen qajetti úılesimdilikke qoıylatyn talaptardyń oryndalýyn qamtamasyz etý.

«Ókiletti organ óz memleketiniń zańnamasyna sáıkes, Birlesken baılanys júıesiniń jumys isteýin qamtamasyz etý maqsatynda óziniń baılanys jelisi resýrsyn paıdalana alady. Biryńǵaı tehnıkalyq tásil, qazirgi zamanǵy áskerı tehnıkamen, baılanys jabdyǵymen basym túrde jaraqtandyrý negizinde qurylatyn Birlesken baılanys júıesi memleketter qarýshy kúshteriniń jaýyngerlik qabiletin arttyrady», - dedi QR Qorǵanys mınıstriniń orynbasary Daryn Tuıaqov.

Óz kezeginde senator Nurjan Nursıpatov Kelisim Qazaqstan Respýblıkasynyń Konstıtýtsııasyna, Qazaqstan Respýblıkasynyń zańnamasyna, Qazaqstan ratıfıkatsııalaǵan halyqaralyq sharttarǵa jáne Qazaqstan qatysýshysy bolyp sanalatyn halyqaralyq uıymdardyń sheshimderine qaıshy kelmeıtinin aıtty.

Budan buryn habarlanǵandaı, búgin Senattyń jalpy otyrysynda «Táýelsiz Memleketter Dostastyǵyna qatysýshy memleketter qarýly kúshteriniń birlesken gýmanıtarlyq mınasyzdandyrý ınjenerlik bólimshesi týraly kelisimdi ratıfıkatsııalaý týraly» Zańy qabyldandy.