QR Parlamenti Senatynyń depýtaty Álı Bektaev ońtústiktiń turǵyndarymen kezdesti
ShYMKENT. QazAqparat - QR Parlamenti Senatynyń depýtaty, «Aýyl» sotsıal-demokratııalyq partııasynyń tóraǵasy Álı Bektaev Ońtústik Qazaqstan oblysyndaǵy aýdan-qalalardy aralap, halyqpen kezdesip jatyr. Saryaǵash aýdanynda bolǵan senator jergilikti bılik ókilderi men turǵyndarǵa el damýyn eseleıtin mańyzdy qujattardyń mánin túsindirdi, dep habarlaıdy QazAqparat HAA tilshisi.
Eńbek demalysynda elmen júzdesken halyq qalaýlysy Elbasy salǵan dara joldy dáriptedi.
«Bolashaqqa baǵdar: rýhanı jańǵyrý» maqalasynyń mańyzdylyǵyna toqtaldy. Maqalaǵa qatysty oı-pikirlerimen bólisip, osyǵan baılanysty Parlamentte qabyldanyp jatqan zańdar, atqarylǵan jumystar jaıynda baıandap ketti. Joǵarǵy palata depýtaty, sondaı-aq elimizde oryn alyp jatqan oń ózgeristerdi sóz etip, shildeniń 1-inen bastap qolǵa alynǵan mindetti áleýmettik medıtsınalyq saqtandyrý boıynsha da keńinen aqpar berdi.
Óz kezeginde turǵyndar talaı ýaqyt túıini tarqamaǵan túıtkildi máselelerin aıtyp, senatordan kómek surady. Olardyń qatarynda sapaly aýyz sý, jastardy jumyspen qamtý sııaqty jyldar boıy sheshimin tappaı otyrǵan problemalar bar. Halyqtyń muń-muqtajyn muqııat tyńdaǵan Álı Ábdikárimuly qolynan kelgenshe kómek kórsetetinin aıtyp, tıisti mekemelerge tapsyrmalar júktedi.
Halyqpen kezdesýden soń halyq qalaýlysy Qaplanbek aýyldyq okrýgine baryp, «Jabaıy ata» sharýa qojalyǵyn aralap kórdi. Aýmaǵy 22 gektardy quraıtyn jylyjaı jumysyna oń baǵasyn berdi.
