QR Parlamenti Májilisiniń Tóraǵalyǵyna Baqtyqoja Іzmuhambetov usynyldy
ASTANA. QazAqparat - QR Parlamenti Májilisiniń Tóraǵasy laýazymyna Baqtyqoja Іzmuhambetov usynyldy. Ortalyq saılaý komıssııasynyń tóraǵasy Qýandyq Turǵanqulov jalpy otyrys barysynda Májilis Tóraǵasy memlekettik tildi erkin meńgergen bolýy kerek ekenin atap ótti.
«Tóraǵa Májilis depýtattarynyń arasynan palata depýtattary jalpy sanynyń kópshilik daýsymen jasyryn daýys berý arqyly saılanady. Májilis Tóraǵasynyń qyzmetine kandıdatýralardy palatanyń depýtattary usynady»,-dedi Q. Turǵanqulov.
Osy rette QR Parlamenti Májilisiniń depýtaty Nurlan Ábdirov Májilis Tóraǵalyǵyna Baqtyqoja Іzmuhambetovti usyndy. «Baqtyqoja Salahıtdınuly tájirıbesi mol, ártúrli salada qyzmet atqarǵan tulǵa. Eńbek jolyn 1971 jyly óndiristen bastap, munaı-gaz salasynda jıyrma jyldan astam eńbek etti. Sonymen qatar memlekettik organdarda uzaq jyldar qyzmet atqardy»,-dedi N. Ábdirov.
Qazaqstan Respýblıkasynyń Energetıka jáne mıneraldy resýrstar mınıstrligin basqardy, birqatar oblystardyń ákimi boldy. Qazaqstan Respýblıkasy Parlamentiniń Májilisi Tóraǵasynyń orynbasary laýazymyn atqardy. Qazaqstannyń memleket jáne qoǵam qaıratkeri.
«Osyǵan baılanysty depýtat Іzmuhambetovtiń kandıdatýrasy laıyqty, sebebi Baqtyqoja Salahıtdınuly Úkimet jumysynyń qyr-syryn, óńirdiń erekshelikterin jáne Parlamenttegi qyzmetti jaqsy biledi»,-dedi N. Ábdirov.
Jalpy otyrys barysynda talqylaý barysynda depýtattar usynylǵan kandıdatty qoldady. Endi, daýys berý júrip jatyr.
