QR Parlamenti Májilisinde kezekten tys Prezıdent saılaýyn ótkizý týraly QHA Keńesiniń bastamasy qaraldy
ASTANA. QazAqparat - Búgin Parlament Májilisiniń jalpy otyrysynda Qazaqstan halqy Assambleıasy keńesiniń kezekten tys prezıdent saılaýyn ótkizý týraly usynysy qaraldy.
Jıyn barysynda depýtat Jumataı Álıev Qazaqstan halqy Assambleıasy Keńesiniń úndeýin jarııalaǵan bolatyn.
«Álemdik daǵdarys pen kúrdeli halyqaralyq ahýal jaǵdaıynda kezekten tys prezıdenttik saılaý ótkizý týraly jalpyhalyqtyq bastamany ilgeriletý ýaqyt talabynan týyndap otyr», - dedi depýtat J. Álıev. Onyń aıtýynsha, úndeýde qamtylǵandaı, Elbasyna senim mandatyn usyný álemdik ekonomıkadaǵy turaqsyzdyq kezeńin tabysty eńserý úshin, Qazaqstan ózi tańdaǵan baǵdaryna den qoıyp, álemniń damyǵan otyz eliniń qataryna enýi úshin qajet. Bul qazaqstandyqtardy Prezıdent N. Nazarbaevtyń aıqyndaǵan baǵdaryna toptastyrýǵa, barlyq kúsh-jigerdi aldaǵy eldik maqsattarǵa jumsaýǵa múmkindik beredi.
«Elbasyna senim bildirý mandaty álemdik damýdyń jańa kezeńinde halqymyzdy biriktirip, toptastyra túsedi. Búgingi kúni elimizde elimizde «Nurly jol» baǵdarlamasy, «Qazaqstan-2050» uzaqmerzimdi strategııasyn júzege asyrý úshin barlyq resýrstardy biriktirý qajet. Memleket basshysy júrgizip otyrǵan saıasat tóńireginde toptasý elimizdiń odan ári qaryshty damýy men azamattardyń ál-aýqatyn odan ári arttyrýdyń kepildigi bolyp tabylatyndyǵyna senimdimiz», delingen Úndeýde.
Jıyn barysynda osy máselege qatysty sóz sóılegen depýtattardyń barlyǵy kezekten tys prezıdent saılaýyn ótkizý týraly bastamaǵa qoldaý bildirdi.
