QR Parlamenti Májilisi saılaýy ashyq, erkin ári demokratııalyq ustanymdarǵa saı ótti - ShYU

ASTANA. QazAqparat - Shanhaı Yntymaqtastyq Uıymy mıssııasynyń baıqaýshylary QR Parlamenti Májilisi depýtattarynyń saılaýy barysynda zań buzýshylyqtardy anyqtaǵan joq. Bul týraly búgin QR OSK-de ótken brıfıngte ShYU Bas hatshysynyń orynbasary, mıssııa jetekshisi Azız Nosırov málim etti.

«Mıssııa QR Parlamenti Májilisiniń saılaýy QR Konstıtýtsııasyna, Saılaý týraly konstıtýtsııalyq zańyna jáne memleket qabyldaǵan halyqaralyq mindettemelerge saı ashyq, erkin ári demokratııalyq jolda ótkizilgenin málimdeıdi. Mıssııa ulttyq saılaý zańnamasy normalarynyń buzylmaǵandyǵyn atap ótedi», - dedi ol.

Sonymen birge ol daýys berý barysynda Qazaqstan azamattary barynsha belsendilik tanytqandyǵyn atap ótti.

«Mıssııa ókilderi bolǵan barlyq saılaý ýchaskelerinde Qazaqstannyń saıası partııalarynyń, basqa da qoǵamdyq birlestikterdiń ókilderimen qatar halyqaralyq uıymdar men BAQ ókilderi de boldy. Saılaý protsesi barysynda atalǵan baıqaýshylar tarapynan mıssııa ókilderine esh shaǵym túsken joq», - dedi A.Nosırov.

Onyń sózine qaraǵanda, elimizde ótken saılaý barysynda sheteldik baıqaýshylar úshin barlyq jaǵdaı jasalǵan.

«Mıssııa ókilderi saılaý ýchaskeleriniń jabylý, saılaýshylardyń daýystaryn sanaý jáne daýys berýdiń qorytyndysy týraly hattamany jasaý sharalaryna qatysty. Daýystardy sanaý barysynda mıssııa ókilderi eshqandaı buzýshylyqty anyqtaǵan joq», - dedi ol.