QR Parlament Senatynyń kezekti otyrysy ótti
ASTANA. 18 qańtar. QazAqparat - Búgin Qaırat Mámıdiń tóraǵalyq etýimen Parlament Senatynyń kezekti otyrysy boldy.
QR Parlament Senaty baspasóz qyzmetiniń málimetine qaraǵanda, kúntártibine sáıkes, depýtattar Islam Konferentsııasy Uıymynyń Jarǵysyn qarap, ratıfıkatsııalady.
Talqylaý nátıjesinde qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi Eýrazııalyq top týraly kelisim ekinshi kezekte qabyldandy.
Otyrysta sot júıesin odan ári reformalaýǵa baǵyttalǵan zań jobalary qabyldandy.
Olar «Qazaqstan Respýblıkasynyń sot júıesi men sýdıalarynyń mártebesi týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Qazaqstan Respýblıkasy Konstıtýtsııalyq zańynyń jobasy jáne «Qazaqstan Respýblıkasynyń Joǵary Sot Keńesi týraly» Qazaqstan Respýblıkasynyń Zańyna ózgerister men tolyqtyrýlar engizý jáne Qazaqstan Respýblıkasynyń keıbir zańnamalyq aktileriniń kúshin joıyldy dep taný týraly» zań jobalary bolatyn.
Elimizdiń keıbir zańnamalyq aktilerine isterdi qaraýdyń apellıatsııalyq, kassatsııalyq jáne qadaǵalaý tártibin jetildirý, senim deńgeıin arttyrý jáne sot tóreligine qol jetimdilikti qamtamasyz etý máseleleri boıynsha ózgerister men tolyqtyrýlar engizý týraly zań jobasy birinshi oqylymda maquldandy.
Talqylaý barysynda týyndaǵan depýtattardyń kóptegen saýaldaryna elimizdiń Joǵarǵy Sotynyń tóraǵasy B.Beknazarov jaýap berdi.
Otyrysta qaralǵan «Áskerı qyzmet jáne áskerı qyzmetshilerdiń mártebesi týraly» zań jobasy qabyldandy, al qoldanystaǵy keıbir zańnamalyq aktilerge qorǵanys jáne áskerı qyzmet máseleleri boıynsha ózgerister men tolyqtyrýlar engizý týraly zań jobasy birinshi oqylymda maquldandy.
Otyrysta sondaı-aq «Investıtsııalar týraly» 2003 jylǵy 8 qańtardaǵy Qazaqstan Respýblıkasynyń Zańyna ózgerister men tolyqtyrýlar engizý týraly» jáne «Qazaqstan Respýblıkasynyń Eńbek kodeksine ózgerister men tolyqtyrýlar engizý týraly» zańdar qabyldandy.
Elimizdiń keıbir zańnamalyq aktilerine probatsııa qyzmeti máseleleri boıynsha ózgerister men tolyqtyrýlar engizý týraly zań jobasy birinshi oqylymda maquldandy.
Palata qaraýyna usynylyp, birinshi oqylymda maquldanǵan jobalardyń qatarynda «Qazaqstan Respýblıkasynyń keıbir zańnamalyq aktilerine básekege qabiletti kásiporyndardy saýyqtyrý máseleleri boıynsha ózgerister men tolyqtyrýlar engizý týraly» jáne «Qazaqstan Respýblıkasynyń keıbir zańnamalyq aktilerine zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zańdar da bar.
Zań jobasynyń erejeleri boıynsha qarjy mınıstri B.Jámishev qajetti túsinikteme berdi.
Otyrys sońynda Q.Mámı bıylǵy 15 qańtardaǵy kezekten tys parlament saılaýynyń nátıjelerine nazar aýdara kelip, «qalyptasqan kóppartııaly Parlament memlekettik organdar júıesindegi zań shyǵarý organynyń róli men ornyn kúsheıte túsedi», dedi.
Q.Mámı atap ótkendeı, «Senat Májilis bolmaǵan kezde konstıtýtsııalyq erejelerge sáıkes, tutastaı Parlamenttiń zań shyǵarý mindetin oryndady».
«Senat toqtaýsyz jumys istedi, eki aıda 60-qa jýyq zań qabyldanyp, Memleket basshysyna qol qoıýǵa jiberildi. Onyń 95 paıyzy Májilis portfelinen alynǵan bolatyn»,-dedi Q.Mámı.
