QR OSK tóraǵasy EQYU DIAQB dırektorymen eldegi saıası reformalar jóninde pikir almasty
ASTANA. KAZINFORM – Eýropadaǵy qaýipsizdik jáne yntymaqtastyq uıymynyń (EQYU) Demokratııalyq ınstıtýttar jáne adam quqyqtary jónindegi bıýro (DIAQB) dırektory Marııa Telalıannyń shaqyrýymen QR OSK tóraǵasynyń orynbasary Muhtar Erman Saılaýdy baıqaý jónindegi úılestirýshiler jıynynyń jumysyna qatysyp jatyr.
QR Ortalyq saılaý komıssııasy baspasóz qyzmetiniń habarlaýynsha, Varshava qalasyndaǵy EQYU DIAQB bas keńsesinde ótip jatqan joǵary deńgeıdegi forýmǵa Eýropanyń 33 elinen, AQSh, Kanadanyń ókilderi jınaldy.
Delegatsııalardyń quramynda ortalyq saılaý organdarynyń, syrtqy saıası vedomstvolardyń, saraptamalyq qaýymdastyq pen azamattyq qoǵam ókilderi bar.
Kún tártibine saılaýdy baıqaý mıssııalaryn qalyptastyrý, olardy daıarlaý, qyzmetin uıymdastyrý jáne resmı organdarmen ózara is-qımyl máseleleri qoıyldy.
Іssapar baǵdarlamasy aıasynda Muhtar Erman EQYU DIAQB dırektory Marııa Telalıanmen kezdesti.
Múddeli ári mazmundy dıalog barysynda Ortsaılaýkom tóraǵasynyń orynbasary Qazaqstan Prezıdenti Qasym-Jomart Toqaev bastamashy bolǵan konstıtýtsııalyq reforma aıasynda elde júzege asyrylyp jatqan aýqymdy jumystar týraly ózekti aqparatty usyndy.
Suhbattasýshyǵa saıası transformatsııanyń negizgi aspektileri tanystyryldy. Ókildik bılik organdaryndaǵy aldaǵy ózgeristerge, bir palataly Quryltaıdyń qurylýy, onyń depýtattarynyń partııalyq tizimder boıynsha saılanýy, vıtse-prezıdent laýazymynyń engizilýi, sondaı-aq zań shyǵarýshylyq bastama quqyǵyna ıe Halyq keńesiniń qurylýyna arnaıy nazar aýdaryldy.
Marııa Telalıan mańyzdy aqparat úshin alǵysyn bildirip, aldaǵy jalpyulttyq referendýmǵa EQYU DIAQB baıqaý mıssııasyn jiberý máselesin talqylaýǵa daıyn ekendigin jetkizdi.
QR Konstıtýtsııasy jobasynyń mazmuny aǵylshyn tilindegi materıaldar men ınfografıka túrinde de keńes qatysýshylarynyń nazaryna jetkizildi. Birqatar delegatsııa ókilderi ártúrli halyqaralyq baıqaý mıssııalarynyń quramynda qatysýǵa qyzyǵýshylyq bildirdi.
Muhtar Erman QR Ortalyq saılaý komıssııasy EQYU DIAQB uzaq merzimdi (AQSh saılaýlary) jáne qysqa merzimdi (Ázerbaıjan, Moldova) saılaýdy baıqaý mıssııalarynyń quramynda tájirıbe qoryn arttyryp jatqandyǵyn atap ótti.
Kezdesý sońynda Marııa Telalıanǵa QR Ortalyq saılaý komıssııasynyń bastamasymen saılaý taqyrybynda jaryq kórgen kitaptyń aǵylshyn tilindegi nusqasy syıǵa tartyldy.
Varshavadaǵy issapar baǵdarlamasy aıasynda Muhtar Ermannyń Polsha Respýblıkasynyń Ulttyq saılaý bıýrosynyń basshysy Pafal Tkachpen kezdesýi ótti. Suhbattasýshylar saılaý organdarynyń qazirgi qyzmeti týraly aqparatpen bólisti, yntymaqtastyq perspektıvalaryn talqylady, onyń ishinde jastardyń belsendiligin arttyrý jáne saılaý komıssııalary múshelerin júıeli oqytý máseleleri boıynsha birqatar basymdyqtardyń uqsastyǵyn atap ótti. Saılaýda tsıfrlyq tehnologııalardy paıdalaný máselesi jekeleı qaraldy. Polshalyq áriptester kıberqaýipsizdiktiń qamtamasyz etilýi men saılaýshylardyń jeke derekterin qorǵaý basty másele ekenin erekshe atap ótti, sondaı-aq jalǵan aqparattyń zańsyz taralýynyń kúsheıý úrdisine nazar aýdardy.
Qazirgi tańda Polshada daýys berý qaǵaz bıýlletenderi arqyly júrgizilip, azamattardyń erik bildirýiniń qorytyndylary qolmen esepteledi.
QR OSK basshysynyń orynbasary Polsha Ulttyq saılaý bıýrosynyń basshylyǵyna Qazaqstandaǵy aldaǵy konstıtýtsııalyq reformanyń negizgi baǵyttaryn tanystyryp, josparlanǵan referendýmǵa aýyzsha aldyn ala shaqyrýdy jetkizdi.
Taraptar ózara kásibı baılanystardy jalǵastyrý týraly kelisti.
Osyǵan deıin Ortalyq saılaý komıssııasy alǵash ret EQYU DIAQB shtab-páterine barǵany týraly jazdyq.