QR OSK saılaýshylardyń daýys berý belsendiligi joǵary bolatyndyǵyna úmit artady
ASTANA. QazAqparat - Búgin QR Ortalyq saılaý komıssııasy tóraǵasynyń orynbasary Vladımır Foos Moldova Respýblıkasynan kelgen baıqaýshylar delegatsııasymen kezdesti.
Júzdesý barysynda V.Foos halyqaralyq baıqaýshylardy elimizdiń saılaý zańnamasynyń erekshelikterimen, sonymen birge QR Ortalyq saılaý komıssııasynyń kezekten tys prezıdenttik saılaýǵa daıyndyq sharalarymen jan-jaqty tanystyrdy.
«Ortalyq saılaý komıssııasy jáne basqa da qoǵamdyq birlestikter tarabynan aqparattyq jumystar óz deńgeıinde júrgizildi. Bizdiń oıymyzsha, saılaýshylardyń basym bóligi erteń saılaý ýchaskelerine keledi ári olardyń belsendiligi joǵary bolady», - dedi ol.
Óz kezeginde halyqaralyq baıqaýshylar aldaǵy saılaýdyń Qazaqstan úshin mańyzdylyǵyn erekshe atap ótip, ony tabysty ótkizýge tilektes ekendikterin bildirdi.
Aıta keteıik, V.Foospen kezdesýge Moldova tarabynan atalǵan eldiń Ortalyq saılaý komıssııasynyń múshesi Aleksandr Sımıonov pen Moldova OSK janyndaǵy Saılaý salasynda úzdiksiz bilim berý ortalyǵynyń ádiskeri Iana Kozyrıýk qatysty.
