QR OSK saılaý naýqanyna qatysýshylardy ádistemelik qamtamasyz etýge baılanysty eń birinshi brıfıngin ótkizdi

ASTANA. QazAqparat - QR Parlament Májilisi men barlyq deńgeıdegi máslıhat depýtattarynyń qatysty QR Ortalyq saılaý komıssııasynyń saılaýshylarǵa arnalǵan úndeýi 62 myńnan astam danamen elimizdiń barlyq óńirlerine taratylady. Bul týraly búgin QR OSK múshesi Tatıana Ohlopkova málim etti.

«Ortalyq saılaý komıssııasynyń mańyzdy mindetteriniń biri saılaý naýqanyna qatysýshylardy quqyqtyq oqytý bolyp tabylady. Onyń aýqymynda ádistemelik qamtamasyz etýge aıryqsha nazar aýdarylady. Biz alǵash ret dál osy máselege baılanysty brıfıng ótkizip otyrmyz», - dedi ol.

Onyń atap ótýinshe, aldaǵy saılaý naýqanyna oraı Ortalyq saılaý komıssııasy 8 aqparattyq plakat, 14 ádistemelik jadnama, jınaqtar jáne basqa da aqparattyq baspa ónimderin ázirlegen.

«QR Ortalyq saılaý komıssııasynyń elimizdiń barlyq saılaýshylaryna arnalǵan úndeýine de erekshe nazar aýdartqym keledi. 22 qańtar kúngi OSK otyrysynda úndeý mátini qabyldandy. 62 myń danadan asatyn úndeý plakattary elimizdiń barlyq óńirlerine jóneltilip, adamdar kóp jınalatyn áýejaılarda, vokzaldarda, kólik quraldarynda, bazarlarda jáne basqa da jerlerde ilinetin bolady», - dedi T.Ohlopkova.

Onyń aıtýynsha, saılaýshy turaqty tirkelgen jerinen tys eldi mekende bolsa, onda 18 aqpannan keshiktirmeı, ýaqytsha bolatyn jerindegi ákimdikke saılaý kúni óziniń daýys beretin saılaý ýchaskesiniń saılaýshylar tizimine engizý týraly ótinishpen júginýge quqyly. Sonymen qatar saılaýshy óziniń eldi mekeninen tysqary jerge ketetin jaǵdaıda, 4 naýryzdan bastap 19 naýryz kúngi saǵat 18:00-ge deıingi kezeńde daýys berý quqyǵyn beretin esepten shyǵarý kýáligin óziniń tirkelgen jeri boıynsha saılaý ýchaskesinen alyp, kez kelgen saılaý ýchaskesinde daýys bere alady. Bir eldi mekenniń sheginde daýys berý úshin esepten shyǵarý kýálikteri berilmeıdi.