QR OSK óńirdegi ókilderin aldaǵy saılaýǵa daıarlap jatyr

ASTANA. QazAqparat - QR Ortalyq saılaý komıssııasy alǵash ret «Qazaqstan Respýblıkasynda saılaý protsesterin uıymdastyrý erekshelikteri boıynsha ary qaraı oqytýdy júzege asyrý úshin trenerlik korpýsty daıarlaý» taqyrybynda elektorattyq oqytý semınaryn ótkizip jatyr, dep habarlaıdy QazAqparat.

Bul sharanyń maqsaty - respýblıkalyqtan bastap jergilikti deńgeıge deıin saılaý komıssııalary kadrlarynyń biliktiligin arttyrý.

«Osy semınar eki kún boıy ótedi. Onda Ortalyq saılaý komıssııasynyń barlyq músheleri dáris oqıdy. Bul turǵyda el óńirlerinen kelgen qatysýshylar úshin saılaý quqyǵy boıynsha túrli taqyryptar qamtylady. Búgingi semınarǵa deıin bir aı boıy qashyqtyqtan oqytý sharalary júrgizildi»,- dep toqtaldy OSK hatshysy Sábıla Mustafına.

Onyń sózine qaraǵanda, elimizdiń barlyq óńirlerinen kelgen 150 adam testileýden ótip, oblystarda elektorattyq oqytýdy júrgizý quqyǵyna ıe trenerler retinde sertıfıkattalady.

«Biz bul bilimdi óńirlerde keńinen taratý úshin trenerlik korpýsty daıarlap jatyrmyz. Sondyqtan árbir óńirden 6-10 adamnan keldi. Olar ózderiniń oblystaryna barǵannan keıin saılaý komıssııalarynyń músheleri men uıymdastyrýshylary úshin dáris oqı alady. Sonymen qatar OSK turaqty túrde atalǵan trenerlerdi ádistemelik turǵyda súıemeldep otyrady. ıAǵnı, biz olarmen jumysty ary qaraı da jalǵastyramyz», - dedi OSK hatshysy.

Aıta keteıik, Qazaqstannyń 14 oblysy men Astana jáne Almaty qalalarynan kelgen barlyq 150 trenerge OSK tóraǵasy Berik Imashev Qazaqstanda saılaý júıesin damytý jaıynda dáris oqydy.

«Memleket basshysy bastama etip kótergen áleýmettik jańǵyrtý jaǵdaıynda bizdiń aldymyzda turǵan jańa maqsattar men mindetter óńirlik saılaý komıssııalaryndaǵy áriptesterimizdiń joǵary kásibı daıarlyǵyn talap etedi. Saılaýdy uıymdastyrýshylar aldynda turǵan negizgi mindet  - zańdy buljytpaı oryndaý», - dedi B. Imashev.

Semınar 3-5 qazan aralyǵynda QR Prezıdenti janyndaǵy Memlekettik basqarý akademııasynyń bazasynda ótedi.