QR OSK Májilis saılaýyn 2016 jyldyń 20 naýryzyna belgileý týraly qaýly qabyldady (FOTO)

ASTANA. QazAqparat - Búgin Ortalyq saılaý komıssııasy Májilis taratylǵannan keıin QR Parlamenti Májilisiniń jáne barlyq deńgeıdegi máslıhattar depýtattarynyń kezekten tys saılaýlaryn 2016 jyldyń 20 naýryzyna belgileý týraly qaýly qabyldaǵan alǵashqy otyrysyn ótkizdi.

Budan basqa, otyrysta QR Parlamenti Májilisi ókilettiliginiń merziminen buryn toqtatylýyna baılanysty Memleket basshysynyń Jarlyǵymen taǵaıyndalǵan Parlament Májilisi jáne máslıxattar depýtattarynyń saılaýlaryn daıyndaý jáne ótkizý kúntizbelik jospary, sondaı-aq osy saılaý naýqandaryn uıymdastyrýǵa qajetti saılaý qujattarynyń úlgileri bekitildi.

«Saılaý naýqanynyń barlyq negizgi kezeńderin biz Zań normalaryna sáıkestendirdik», - dedi QR OSK hatshysy Baqyt Meldeshov.