QR OSK máslıhattardyń shyǵyp qalǵan depýtattarynyń ornyna saılaý qorytyndylaryn jarııalady
ASTANA. 1 qarasha. QazAqparat - «Qazaqstan Respýblıkasyndaǵy saılaý týraly» Qazaqstan Respýblıkasy Konstıtýtsııalyq zańynyń 101-baby 4-tarmaǵyna sáıkes, aǵymdaǵy jyldyń 31 qazan kúni respýblıkanyń 13 óńirinde shyǵyp qalǵandardyń ornyna máslıhattar depýtattaryn saılaý 63 saılaý okrýginde bir mezgilde ótkizildi.
QR Ortalyq saılaý komıssııasynyń baspasóz qyzmeti habarlaǵandaı, barlyǵy oblystyq máslıhattardyń 6, qalalyq máslıhattardyń 5 jáne aýdandyq máslıhattardyń 52 depýtaty saılandy.
167 kandıdat usynyldy. Bir depýtattyq mandatqa básekelestik orta eseppen alǵanda 2 kandıdattan artyq boldy.
Saılaý bıýlletenderine 136 kandıdattyń aty-jóni engizildi. Olardyń 73-i - ózin-ózi usynǵandar. 32 kandıdat óziniń partııaǵa qatystylyǵyn kórsetpegen, taǵy 40 kandıdat - partııada joqtar.
Aldyn ala málimetter boıynsha, saılaýshylardyń daýys berýge kelýi 79,5 % qurady.
Daýys berý barysy men daýystardy sanaý rásimin baıqaýdy 741 kandıdattardyń senim bildirilgen adamdary, saıası partııalardyń, qoǵamdyq birlestikterdiń jáne buqaralyq aqparat quraldarynyń ókilderi júrgizdi.
Saılanǵan 63 depýtattyń barlyǵy «Nur Otan» HDP-nyń múshesi bolyp tabylady. Saılanǵan máslıhattar depýtattarynyń quramynda:
- erler - 52 (82,5%)
- áıelder - 11 (17,5%).
Jalpy alǵanda saılaý naýqany saılaý zańnamasy talaptaryna sáıkes ótti. Ortalyq saılaý komıssııasyna kelip túsken shaǵymdar men ótinishter joq.
