QR OSK máslıhat depýtattaryn saılaý qorytyndysyn shyǵardy

ASTANA. QazAqparat - Jeksenbi, 28 qazan kúni Túrkistan oblysyn, Astana jáne Shymkent qalalaryn qospaǵanda, elimizdiń 14 óńirinde shyǵyp qalǵan máslıhat depýtattarynyń ornyna saılaý ótti. Bul týraly QazAqparat QR Ortalyq saılaý komıssııasyna silteme jasap habarlaıdy.

Saılaý 83 saılaý okrýginde, onyń ishinde 12 oblystyq, 9 qalalyq jáne 62 aýdandyq máslıhattardyń okrýgterinde ótti. Oǵan 14 oblystyq, 8 qalalyq, 46 aýdandyq, 83 okrýgtik, 326 ýchaskelik saılaý komıssııalary jumyldyryldy.

«Saılaý naýqany barysynda depýtattyqqa 284 kandıdat usynylyp, barlyq deńgeıdegi máslıhattarǵa olardyń 252-si tirkeldi. 7 kandıdattyń tirkelýi kúshin joıǵannan keıin, saılaý bıýlletenderine 245-i engizildi. Ortasha básekelestik shamamen bir depýtattyq mandatqa 3 kandıdattan keledi (2,95), daýys berýshilerdiń sany 69,9% qurady. Saılanǵan máslıhat depýtattarynyń 66-sy er adam (79,5%), 17 - áıelder (20,5%). Saılanǵan máslıhat depýtattarynyń ortasha jasy - 47,4. Saılaý naýqany respýblıka saılaý zańnamasynyń normalaryna sáıkes ótti», - delingen OSK habarlamasynda.