QR OSK ınternette saýalnama júrgizýge qatysty eskertý jasady

NUR-SULTAN. QazAqparat - QR Ortalyq saılaý komıssııasy Internet jelisinde áleýmettik saýalnama júrgizý jaǵdaılarynyń jıileýine baılanysty zańnama talaptaryn saqtaý qajettiligin eskertedi, dep habarlaıdy QazAqparat tilshisi.

«Qazaqstan Respýblıkasyndaǵy saılaý týraly» Konstıtýtsııalyq zańynyń 28-babynyń 9-tarmaǵyna sáıkes qoǵamdyq pikirge saýalnama júrgizýdi Qazaqstan Respýblıkasynyń zańnamasyna sáıkes tirkelgen, qoǵamdyq pikirge saýalnama júrgizýde keminde bes jyl tájirıbesi bar zańdy tulǵalar tıisti qujattardyń kóshirmelerin Ortalyq saılaý komıssııasyna jazbasha túrde aldyn ala habardar ete otyryp, júrgizýge quqyly.

OSK-ǵa jiberiletin habarda saýal salýdy júrgizýge qatysatyn jáne osy salada jumys tájirıbesi bar mamandar týraly; qoǵamdyq pikirge saýal júrgiziletin óńirler týraly; qoldanylatyn taldaý ádisteri týraly málimetter kórsetiledi.

Qoǵamdyq pikirge saýalnama júrgizý nátıjelerin, saılaý, saılaýǵa baılanysty ózge de zertteýler, kandıdattardy ne saıası partııalardy qoldap daýys berý nátıjeleriniń boljamdaryn daýys beriletin kúnniń aldyndaǵy bes kún ishinde jáne daýys beriletin kúni Internet jelisinde jarııalaýǵa jol berilmeıdi.

Búgingi kúni áleýmettik zertteýlerdi júrgizý týraly tıisti túrde resimdelgen habarlar Ortalyq saılaý komıssııasyna eki uıymnan ǵana: «Qoǵamdyq pikir» ınstıtýty qoǵamdyq birlestiginen jáne «Jastar» Ǵylymı-zertteý ortalyǵy» JShS-nen kelip tústi.