QR OSK bıýlleteniniń mátinin bekitip, olardyń qorǵalý dárejesin belgiledi

ASTANA. QazAqparat - Búgin QR Ortalyq saılaý komıssııasynyń otyrysynda «2016 jylǵy 20 naýryzǵa taǵaıyndalǵan Qazaqstan Respýblıkasy Parlamenti Májilisi depýtattarynyń kezekten tys saılaýy boıynsha saıası partııalarǵa jáne máslıhattary depýtattarynyń kezekti saılaýy boıynsha daýys berýge arnalǵan saılaý bıýlletenderi týraly» qaýly qabyldandy.

Atalǵan qaýly jobasyn tanystyrǵan QR OSK tóraǵasynyń orynbasary Vladımır Foostyń aıtýynsha, «Qazaqstan Respýblıkasyndaǵy saılaý týraly» Qazaqstan Respýblıkasynyń 1995 jylǵy 28 qyrkúıektegi Konstıtýtsııalyq zańynyń 12, 24 jáne 37 baptaryna sáıkes QR OSK 2016 jylǵy 1 qańtardaǵy jaǵdaı boıynsha saılaý komıssııalaryna usynylǵan saılaýshylar týraly málimetterge saı daıyndalýǵa jáne saılaý ýchaskelerine jetkizilýge tıis saılaý bıýlletenderiniń sany elimizdegi saılaýshylardyń jalpy sanynyń 1 paıyz rezervin qosa alyp daıyndalǵan.

Atap aıtqanda, QR Parlamenti Májilisi depýtattarynyń kezekten tys saılaýy boıynsha 9889075 dana, QR máslıhattary depýtattarynyń kezekti saılaýy boıynsha 18321969 dana bıýlleten basyp shyǵarylady.

Sondaı-aq Ortalyq saılaý komıssııasy saıası partııalarǵa daýys berýge arnalǵan saılaý bıýlleteniniń mátinin bekitip, saılaý bıýlletenderiniń qorǵalý dárejesin belgiledi.