QR OSK akkredıttegen sheteldik baıqaýshylar sany 236 adamǵa jetti

ASTANA. QazAqparat - QR Ortalyq saılaý komıssııasy akkredıttegen sheteldik baıqaýshylar sany 236 adamǵa jetti. Bul týraly búgin BAQ ókilderine QR OSK múshesi Tatıana Ohlopkova málim etti.

«Qazirgi ýaqytta QR Syrtqy ister mınıstrliginiń usynysymen Ortalyq saılaý komıssııasy shet memleketter men halyqaralyq uıymdardyń 236 baıqaýshysyn akkredıttedi. Onyń ishinde 3 mıssııanyń, atap aıtqanda EQYU/DIAQB, TMD baıqaýshylary jáne ShYU baıqaýshylary mıssııalary bar», - dedi ol.

Sonymen qatar T.Ohlopkova QR Syrtqy ister mınıstrliginde tirkelgen 19 memlekettiń buqaralyq aqparat quraldarynyń 98 ókili de kezekten tys prezıdenttik saılaýda baıqaýshy bola alatyndyǵyn atap ótti.

«Budan bólek, otandyq baıqaýshylardyń da saılaýǵa baqylaý júrgizýge quqyqtary bar. Olar: saıası partııalardyń, qoǵamdyq uıymdardyń, kommertsııalyq emes uıymdardyń ókilderi. Sonymen qatar Qazaqstan Respýblıkasynyń buqaralyq aqparat quraldarynyń ókilderi de saılaýǵa baıqaý júrgize alady. BAQ ókilderiniń qyzmettik kýáligi men redaktsııa tapsyrmasy bolsa jetkilikti», - dedi OSK múshesi.