QR Ortsaılaýkom QHA-dan Májilis depýtattaryn saılaý erejesin túsindirdi
QR Ortsaılaýkom QHA-dan Májilis depýtattaryn saılaý erejesin túsindirdi
ASTANA. QazAqparat - Daýys berýge qatysqan Assambleıa músheleriniń 50 paıyzdan astamy daýys bergen kandıdat Májilis depýtaty bolyp saılanady. Bul týraly búgin QR Ortalyq saılaý komıssııasynyń múshesi Tatıana Ohlopkova málim etti.
Onyń atap ótýinshe, Assambleıa saılaıtyn Májilis depýtattyǵyna kandıdattarǵa qoıylatyn talaptardyń partııalyq tizimder boıynsha saılanatyn Májilis depýtattyǵyna kandıdattarǵa qoıylatyn talaptardan aıyrmashylyǵy joq. Kandıdattardy usyný quqyǵy Qazaqstan halqy Assambleıasyna sessııalar arasyndaǵy kezeńde basshylyq etetin jáne qazirgi ýaqytta 67 adamnan turatyn Assambleıa Keńesine tıesili. Kandıdattardy tirkeýdi Ortsaılaýkom 29 aqpannan 5 naýryzǵa deıingi aralyqta júrgizedi. Assambleıa saılaıtyn Májilis depýtattyǵyna kandıdattar saılaý jarnasyn tólemeıdi jáne saılaý qoryn qurmaıdy.
Assambleıanyń joǵarǵy basqarýshy organy sessııany Qazaqstan Respýblıkasynyń Prezıdenti shaqyrady. Sessııany shaqyrý týraly ókim onyń bastalýyna 30 kún qalǵanda qabyldanýy tıis, ol týraly buqaralyq aqparat quraldarynda habarlanady. Sessııa jumysyna Assambleıa músheleri jalpy sanynyń keminde úshten eki bóligi qatysqan jaǵdaıda, sessııa zańdy dep sanalady. Oǵan qatysqan múshelerdiń jartysynan kóbi daýys bergen jaǵdaıda, sessııa qabyldandy dep esepteledi. Osy kúnge Qazaqstan halqy Assambleıasynyń quramynda 446 múshe bar.
Daýys berýge arnalǵan pýnkt Assambleıa Sessııasy ótetin ǵımaratta ornalasady jáne Sessııa jumysy bastalǵanǵa deıin bir saǵat buryn ashylady.
Daýys berýge arnalǵan pýnktte halyqaralyq jáne qazaqstandyq baıqaýshylar, buqaralyq aqparat quraldarynyń ókilderi, sondaı-aq Assambleıa saılaıtyn Májilis depýtattyǵyna kandıdattardyń senim bildirilgen adamdary bolýǵa quqyly.
Sessııada Astana qalasynyń qalalyq saılaý komıssııasynyń tóraǵasy daýys berý tártibin túsindirgennen keıin Assambleıa múshelerin daýys berýge arnalǵan pýnktke shaqyrady.
«Ár saılaýshy jeke ózi daýys beredi. Daýys berý quqyǵyn basqa bireýge berýge, basqa adamdar úshin daýys berýge bolmaıdy. Daýys berýge arnalǵan bıýlleten saılaýshylar tiziminiń negizinde saılaýshynyń jeke ózine onyń jeke basyn kýálandyratyn qujatyn usynǵanda beriledi. Daýys berý jáne daýystardy sanaý aıaqtalǵan soń qalalyq saılaý komıssııasy daýys berý qorytyndylary týraly hattama jasap, qol qoıady. Daýys berýge qatysqan Assambleıa músheleriniń 50 paıyzdan astamy daýys bergen kandıdattar saılanǵan dep sanalady», - dedi ol.
T.Ohlopkovanyń sózine qaraǵanda, sessııa qalalyq saılaý komıssııasynyń tóraǵasy daýys berý qorytyndylary týraly hattamany jarııalaǵannan keıin jabylady. Qalalyq saılaý komıssııasynyń hattamasy Ortsaılaýkomǵa eki kúnnen 22 naýryzdan keshiktirmeı usynylýy tıis. Májilistiń saılanǵan depýtattaryn Ortsaılaýkom tirkeıdi. Konstıtýtsııaǵa jáne Respýblıka zańdaryna sáıkes Parlament depýtatynyń mártebesine sáıkes kelmeıtin mindetterin doǵarý týraly Ortsaılaýkomǵa usynǵan ótinishi Májilis depýtattaryn tirkeý úshin mindetti shart bolyp tabylady.
Jalpy Respýblıka boıynsha Májilis depýtattaryn saılaý qorytyndylaryn Ortsaılaýkom 27 naýryzdan keshiktirmeı belgileıdi, al saılaý qorytyndylary týraly habar BAQ-ta 2016 jylǵy 30 naýryzdan keshiktirmeı jarııalanady.
