QR Ortalyq saılaý komıssııasynyń múshesi Ákimshilik sottardyń sanyn birtindep 300-ge deıin jetkizýdi usyndy
ASTANA. Jeltoqsannyń 9-y. QazAqparat /Rýslan Ǵabbasov/ - Búgin Astanada «Qazaqstan Respýblıkasynyń 2010-2020 jyldarǵa arnalǵan Quqyqtyq saıasat tujyrymdamasyn eskere otyryp, ulttyq quqyqtyq júıeni jańǵyrtý» taqyrybynda ótip jatqan konferentsııada QR Ortalyq saılaý komıssııasynyń múshesi Marat Sársembaev Ákimshilik sottardyń sanyn birtindep 300-ge deıin jetkizýdi usyndy,
dep habarlaıdy QazAqparat.
Onyń pikirinshe, adam quqyqtaryn qorǵaý baǵytynda «Azamattardyń ádil sotqa qol jetimdiligi týraly», «Sottardyń qyzmeti jónindegi aqparatqa qol jetimdilik týraly», sondaı-aq «Mamandandyrylǵan sottar týraly» zańdardy ázirleý qajet.
Ákimshilik sot boıynsha sóz qozǵaǵan ol, búginde bul sottar ákimshilik quqyq buzýshylyqqa jol bergen azamattardyń isimen aınalysatynyn, osy oraıda atalǵan sotta qaralatyn máselelerdiń arnasyn basqa baǵyttarǵa burý kerektigin usyndy.
«Atap aıtqanda, bul sottarǵa azamattar zańsyz is-qımyldarǵa barǵan alaqol sheneýnikterdiń áreketterine shaǵymdana alar edi. Onda basqarýshy organdarǵa kelip túsetin hattar jergilikti jerlerde osyndaı sottarda qarastyrylar edi. Osyǵan baılanysty 31 ákimshiliktiń sottyń ornyna, birte-birte olardyń sanyn el boıynsha 200-300-ge deıin jetkizýdiń máni bar shyǵar», dedi M. Sársembaev.
