QR Ortalyq saılaý komıssııasy jergilikti ákimderdiń saılaýyn uıymdastyrý, ázirleý jáne ótkizý máseleleri boıynsha oqý semınarlaryn ótkizbek
Bul týraly Qazaqstan Respýblıkasy Ortalyq saılaý komıssııasynyń baspasóz qyzmetinen habarlady.
Semınarlardyń jumysyna qatysý úshin aldaǵy saılaýdy uıymdastyrý men ótkizýge tartylǵan oblystyq, aýdandyq jáne qalalyq aýmaqtyq saılaý komıssııalarynyń tóraǵalary men hatshylary, aýdan ákimderi, oblys ákimderi apparattarynyń basshylary, máslıhat hatshylary, Qazaqstan Respýblıkasynyń múddeli memlekettik organdarynyń jáne BAQ ókilderi shaqyryldy.
Bul semınarlardyń negizgi maqsaty saılaý uıymdastyrýshylarǵa aldaǵy saılaýǵa ázirlik barysynda týyndaıtyn barlyq máselelerdi Ortalyq saılaý komıssııasynyń múshelerimen, múddeli memlekettik organdardyń ókilderimen jáne saılaý úderisine qatysýshylarmen tikeleı talqylaý múmkindigin berý, sondaı-aq qyzmettiń túrli baǵyttary men semınarda talqylanatyn taqyryptar boıynsha pikir almasý bolyp tabylady.
Atap aıtqanda, semınarlardyń jumysy barysynda Qazaqstan Respýblıkasynyń aýdandyq mańyzy bar qalalary, aýyldyq okrýgteri, aýyldyq okrýgtiń quramyna kirmeıtin kentteri men aýyldary ákimderin qyzmetke saılaý, ókilettigin toqtatý jáne qyzmetten bosatý qaǵıdalarynyń negizgi erejeleri, sondaı-aq saılaý naýqanyn uıymdastyrýǵa, materıaldyq-tehnıkalyq jáne qarjylyq qamtamasyz etýge, saılaý komıssııalarynyń, jergilikti atqarýshy organdardyń jáne múddeli memlekettik organdardyń tıimdi ózara is-qımyl jasaýyna qatysty máselelerdiń keń aýqymy talqylanatyn bolady.
Qatysýshylar aýdandyq jáne qalalyq saılaý komıssııalarynyń róline, fýnktsııalary men ókilettikterine, olardyń músheleriniń qyzmetin uıymdastyrýǵa, ákimdikke kandıdattardy usynýmen, tirkeýmen, olardyń saılaý aldyndaǵy úgitti júrgizýimen, sondaı-aq tańdaýshylar otyrysyn ótkizýdi uıymdastyrýmen, daýys berýmen, daýystardy sanaýmen jáne saılaý qorytyndylaryn shyǵarýmen baılanysty rásimdik máselelerge erekshe kóńil bóletin bolady.
Ortaq talqylaý barysynda syndarly pikir almasý qatysýshylarǵa saılaý úderisin uıymdastyrý sheńberinde júrgiziletin jumystyń tıimdiligin arttyrý boıynsha birqatar usynystar men usynymdar ázirleýge múmkindik beredi dep joramaldanyp otyr.
Oqý semınarlaryn uıymdastyrýshy - Qazaqstan Respýblıkasy Ortalyq saılaý komıssııasy.
