QR Óńirlik damý mınıstrliginde jerdi paıdalanýdyń quqyǵy boıynsha máseleler talqylandy
ASTANA. 10 sáýir. QazAqparat - Búgin Qazaqstan Respýblıkasy Óńirlik damý mınıstrliginiń birinshi vıtse-mınıstri Qaıyrbek Óskenbaevtyń tóraǵalyq etýimen atalǵan mınıstrlik ǵımaratynda keńes ótti. Bul týraly vedomstvonyń baspasóz qyzmetinen habarlady.
QR Óńirlik damý mınıstrliginiń mindetteriniń biri jer resýrstaryn tıimdi basqarý salasyndaǵy memlekettik saıasatty qalyptastyrý jáne iske asyrý bolyp tabylady. Jer resýrstaryn basqarýdaǵy negizgi tıimdi tetik - jer zańnamasy bolyp tabylady, ıaǵnı ol jer máselelerin retteýge baǵyttalǵan. Osyǵan baılanysty atalǵan is-sharanyń negizgi taqyryby jer zańnamasyn jetildirý máselelerin talqylaýǵa arnalǵan.
Atalǵan keńeske QR Bas prokýratýrasy, QR Aýyl sharýashylyǵy mınıstrligi, QR Kólik jáne kommýnıkatsııa mınıstrligi, QR Óńirlik damý mınıstrliginiń departamentteri, jer qatynastary boıynsha jergilikti atqarýshy organdardyń qurylymdyq bólimsheleri, Qazaqstan fermerler odaǵy, «Atameken» Odaǵy» Qazaqstan ulttyq ekonomıkalyq palatasy, aýmaqtyq jer ınspektsııalarynyń basshylary jáne vedomstvolyq mekemeler sııaqty múddeli ortalyq ýákiletti organdardyń ókilderi qatysty.
Kún tártibine jer ýchaskesine quqyq berý rásimin jeńildetý jáne jer ýchaskesiniń kepili jáne jerdi paıdalanýdyń quqyǵy boıynsha máseleler shyǵaryldy.
Keńeske óz baıandamalarymen Jer resýrstaryn basqarý komıtetiniń tóraǵasy Qadyrhan Otarov, Qazaqstan Respýblıkasy Óńirlik damý mınıstrligi Monıtorıng jáne óńirlerdiń tıimdiligin baǵalaý departamentiniń dırektory Almas Batanov, QR Óńirlik damý mınıstrligi Sáýlet, qala qurylysy jáne qurylys departamentiniń dırektory Salaýat Dembaı, QR Óńirlik damý mınıstrligi Jer qatynastary jáne geodezııa salasyn retteý boıynsha departamentiniń dırektory Gúljahan Bımendına qatysty.
Keńestiń qorytyndysy boıynsha birinshi vıtse-mınıstr Qaıyrbek Óskenbaev jer zańnamasyn jetildirý týraly usynystar jasaý boıynsha jumys tobyn qurýdy tapsyrdy.
