QR óńirlerinde órtter barysynda bir adam kóz jumdy, taǵy úsheýi zardap shekti - QR TJM
ASTANA. 30 mamyr. QazAqparat - Qazaqstan aımaqtarynda bolǵan órt oqıǵalarynyń saldarynan er adam qaza taýyp, úsh adam aýrýhanaǵa jetkizildi, dep habarlady QR TJM-niń baspasóz qyzmetinen.
Seısenbi, 29 mamyr kúni Semeı qalasy Shúlbi kentindegi 1-inshi shaǵynaýdanda ornalasqan turǵyn úıdiń besinshi qabatyndaǵy páterde órt boldy. Jalyn tili 3 sharshy metr aýmaqty sharpydy. TJ ornynda 58 jastaǵy er adamnyń máıiti tabyldy. Órt qutqarýshylar kelgenshe sóndirildi. Oqıǵa ornyna QR TJM Shyǵys Qazaqstan oblysy boıynsha TJD órtke qarsy qyzmetiniń 3 adamy men 1 tehnıkasy bardy.
Osy kúni Astanada, Áýezov kóshesinde ornalasqan bes qabatty úıdiń páterinde órt boldy. Jalyn taraǵan aýmaq 2 sharshy metrdi qurady. Úsh adam qaýipsiz jerge kóshirildi. Iis tıip ýlanǵan 18 jasar jigit aýrýhanaǵa jetkizildi. Tilsiz jaýmen kúreske QR TJM Astana qalalyq TJD órtke qarsy qyzmetiniń 18 adamy men 5 tehnıkasy jumyldyryldy.
Sondaı-aq seısenbi kúni, Astanadaǵy Qaraǵandy kóshesinde ornalasqan jekemenshik turǵyn úıde turmystyq gaz ballony jandy. Oqıǵa ornynan kúıik jaraqattarymen 1988 jáne 1984 jylǵy eki azamat aýrýhanaǵa jetkizildi. Órt qutqarýshylar kelgenshe sóndirildi. Oqıǵa ornyna QR TJM Astana qalalyq TJD órtke qarsy qyzmetiniń 7 adamy men 1 tehnıkasy bardy.
