QR Ombýdsmenin taǵaıyndaý Prezıdenttiń quzyrynan Senatqa berildi
Buǵan deıin Adam quqyqtary jónindegi ýəkildi Prezıdent taǵaıyndap keldi.
"Depýtattardan, Parlament palatalarynyń turaqty komıtetterinen, saıası partııalardyń fraktsııalarynan qoldanystaǵy Konstıtýtsııanyń birqatar normalaryna túzetýler engizilgen. QR Prezıdentiniń usynýymen Qazaqstan Respýblıkasyndaǵy adam quqyqtary jónindegi ýákildi bes jyl merzimge qyzmetke saılaý jáne ony qyzmetinen bosatý Parlament Senatynyń erekshe qaraýyna jatqyzyldy",-dedi búgin Ortalyq kommýnıkatsııalar qyzmetinde jýrnalıstermen kezdesken Senat depýtaty Serik Aqylbaı.
Depýtattyń aıtýynsha, adam quqyqtary jónindegi ýákil ınstıtýtyn Konstıtýtsııada bekitý adam men azamattyń quqyqtarynyń basymdyǵyn eń joǵary memlekettik deńgeıde tanýǵa múmkindik bermek.
"Ýəkildiń qyzmetin Konstıtýtsııada bekitý jeke adamnyń mártebesin, adam men azamattyń quqyqtary men bostandyqtaryn iske asyrý kepilin odan ári nyǵaıtýǵa baǵyttalǵan demokratııalyq protsesterdi damytýdaǵy kezekti mańyzdy qadam bolady",-dedi ol.
