QR Olımpıadalyq quramasy 2020 jylǵy Tokıo olımpıadasyna daıyndyqty Japonııada ótkizedi

ASTANA. QazAqparat - Japonııanyń Fýkýoka prefektýrasyndaǵy Kýrýme qalasynda Qazaqstan Ulttyq Olımpıadalyq komıteti men japon taraby 2020 jylǵy Tokıo Olımpıadasynyń qarsańynda olımpıadalyq quramalardy daıyndaý týraly áriptestik  memorandýmǵa qol qoıdy, dep habarlaıdy Ulttyq Olımpıadalyq komıtettiń baspasóz qyzmeti. 

24 shildede Japonııadaǵy Olımpıada oıyndarynyń bastalýyna týra eki jyl ýaqyt qalǵanda Qazaqstan UOK Sport dırektsııasynyń basshysy Elsııar Qanaǵatov pen Fýkýoka gýbernatory Hıroshı Ogava, qala meri Tsýtomý Okýbo áriptestik týraly kelisimdi bekitti. Bul kelisim boıynsha sportshylar tórtjyldyqtyń basty dodasyna sapaly daıyndyq kezeńin júrgizip, atletter úshin mańyzdy sanalatyn akklımatızatsııadan ótýge múmkindik beriledi. 

Saltanatty rásim qaıǵyly jaǵdaıda kóz jumǵan sportshy, Olımpıada oıyndarynyń júldegeri Denıs Tenniń qazasyna baılanysty Qazaqstanǵa kóńil aıtýdan bastaldy. Kýrýme qalasynyń meri Okýbo myrzanyń aıtýynsha, bul tragelııa qazaqstandyq mánerlep syrǵanaýshynyń talantyn qurmetteıtin Japonııa halqyn dúr silkintken. 

Maýsym aıynda Kýrýme qalasynda 2020 jylǵy oıyndar qarsańynda ulttyq quramalardy qabyldaıtyn, barlyq halyqaralyq talaptarǵa jaýap beretin jańa kópsalaly sport kesheni ashyldy. Keshende oıyn túrlerine arnalǵan barlyq komandalardyń jattyǵý júrgizýine múmkindik bar.  Atap aıtar bolsaq, sporttyq gımnastıka, ústel tennısi, jekpe-jek túrleri, jeńil atletıka jáne kanoemen eskek esýshilerge barlyq jaǵdaı qarastyrylǵan. Atalǵan kelisim aıasynda japondyqtar otandyq sportshylardyń qaıtarymsyz negizde jattyǵý jasaýyna múmkindik beredi. 

Aıta ketelik, Qazaqstan UOK Japonııadaǵy jattyǵý ortalyqtarymen kelisim júrgizýdi Rıo-de-Janeırodaǵy Olımpıada oıyndarynan keıin bastaǵan bolatyn. UOK tek qana Fýkýoka prefektýrasymen ǵana emes, Nara prefektýrasynyń ókilderimen de kelisimge kelýde. 

«Tokıo Olımpıadasynyń bastalýyna áli eki jyl baryna qaramastan, Qazaqstan UOK sportshylardyń alańsyz daıyndyǵyn uıymdastyrý úshin belsendi túrde jumys isteýde. Biz ulttyq qurama sportshylary úshin eń úzdik degen jattyǵý ortalyqtaryn taýyp qana qoımaı, birlesken oqý-jattyǵý jıyndaryn ótkizý jóninde de kelisimge kelemiz. Olımpıadalyq sport túrlerindegi quramalardyń jattyǵýyn retteý úshin Japonııanyń ózge de prefektýralarymen kelissózder júrgizemiz», - deıdi Sport dırektsııasynyń basshysy Elsııar Qanaǵatov. 

Kýkrýme qalasynyń meri 2020 jylǵy Olımpıada oıyndarynyń qarsańynda Qazaqstannyń olımpıadalyq quramasyn qabyldaý úlken abyroı ekenin aıtty. Okýbo myrza zamanaýı jattyǵý ortalyqtary otandyq sportshylardyń daıyndyǵyna óz úlesin qosady degen senimde.