QR-nyń respýblıkalyq mańyzdaǵy joldarynda úlken júkti mashınalar qozǵalysyna shekteý qoıylady
ASTANA. QazAqparat - QR respýblıkalyq mańyzdaǵy avtomobıl joldary boıynsha avtokólik quraldary qozǵalysyn uıymdastyrýda aýa temperatýrasy 25S-tan asqan jaǵdaıda bir bilikke 8 tonnadan asatyn júktemesi bar avtokólik quraldarynyń qozǵalysyna shekteý engiziledi, dep habarlady «Qazaqavtojol» RMK baspasóz qyzmeti.
«QR respýblıkalyq mańyzdaǵy qıyrshyqtasty-qatqyl asfalt-betondy jabyndy avtomobıl joldarynda aýanyń temperatýrasy 25S-tan asqan kezde bir bilikke 8 tonnadan asatyn júktemesi bar avtokólik quraldarynyń qozǵalysyna shekteý qoıylady», - dep habarlady baspasóz qyzmeti.
Bul shekteýlerge halyqaralyq kelisimderge sáıkes halyqaralyq júk jáne jolaýshylar tasymalyn júzege asyratyn, tótenshe jaǵdaılardyń aldyn alý jáne joıý sharalaryna tartylǵan, sondaı-aq jol telimderinde jol-qurylys jumystarynda jumys jasap jatqan merdigerlik uıymdardyń avtokólik quraldary jatpaıdy.
Sonymen birge, jolaýshylar tasıtyn tez buzylatyn taýarlardy, júkterdi jáne qaýipti júkterdi tasıtyn kólikterge de bul shekteýler qatysty emes.
Shekteýler aǵymdaǵy jylǵy 1 maýsymnan 31 tamyzǵa deıin saǵat 10.00-nan 22.00-ge deıin aýa temperatýrasy 25 gradýstan joǵary bolǵan jaǵdaıda Almaty, Jambyl, Atyraý, Qaraǵandy, Qyzylorda, Ońtústik Qazaqstan, Mańǵystaý oblystarynda engiziledi», - dep kórsetilgen habarlamada.
1 maýsymnan 15 tamyzǵa deıin saǵat 11.00-den 21.00-ge deıin aýa temperatýrasy 25 gradýstan joǵary bolǵan jaǵdaıda Aqmola, Aqtóbe, Shyǵys Qazaqstan, Qaraǵandy, Qostanaı, Pavlodar, Soltústik Qazaqstan sııaqty oblystarda engiziledi.
«Soltústik Qazaqstan oblysynda «Chelıabi-Novosibir» avtojolynyń júretin bóligin sý basýyna baılanysty 525-530-shi shaqyrym ýchaskesinde (Petropavl qalasynyń mańy) avtokóliktiń barlyq túri boıynsha qozǵalys shekteldi. Munda júrý aınalma jol arqyly júrgiziledi. Jolda aınalyp ótý shemasy kórsetilgen aqparattyq panno qoıylǵan. Avtojoldy táýlik boıy torýyldaý júrgizilýde», dep eske salady «Qazaqavtojol» RMK baspasóz qyzmeti.
