QR-nyń batysynda, ońtústiginde jáne shyǵysynda óte joǵary órt qaýpi saqtalady - 22 mamyrdaǵy aýa raıy boljamy
ASTANA. 21 mamyr. QazAqparat - Qazaqstan aýmaǵynyń basym bóliginde atmosferalyq aǵyndardyń ótýimen 22 mamyrda keı jerlerde jańbyr jaýyp, naızaǵaı oınaıdy, uıtqyǵan jel turyp, keıbir aýdandarda shańdy daýyl soǵady.
Respýblıkanyń ońtústiginde ǵana kún ashyq bolady, keıbir aýdandarda tuman túsedi, jel kúsheıedi, dep habarlady QR TJM baspasóz qyzmeti Qazgıdrometke silteme jasap.
Jambyl, Pavlodar, kúndiz Batys Qazaqstan oblystarynda ekpini 15-20 m/s bolatyn uıtqyǵan jel turady.
Aqmola, Soltústik Qazaqstan, Qaraǵandy, Shyǵys Qazaqstan, Atyraý, Aqtóbe oblystarynyń keıbir aýdandarynda naızaǵaı oınaıdy, uıtqyǵan jeldiń ekpini 15-20 m/s-ke jetedi, Atyraý oblysynda keı jerlerde shańdy daýyl kóteriledi.
Mańǵystaý oblysynda keı jerlerde tuman túsedi.
Qostanaı oblysynda keı jerlerde naızaǵaı oınap, túnde keı jerlerde jeldiń kúsheıýi 15-20 m/s-ke, kúndizgi uıtqýy - 17-22 m/s-ke jetedi.
Respýblıkanyń batysynda, ońtústiginde jáne shyǵysynda óte joǵary órt qaýpi saqtalady.
Taıaýdaǵy táýlikterde respýblıkanyń ońtústigindegi, ońtústik-shyǵysyndaǵy jáne shyǵysyndaǵy ózenderdiń kópshiliginde sý deńgeıi qubylady, Ońtústik Qazaqstan jáne Shyǵys Qazaqstan oblystarynyń keıbir ózenderinde (Arys, Badam, Qara Ertis, Buqtarma, Ob, Úlbi jáne basqalary) jaýyn-shashyn túsýine baılanysty sý deńgeıiniń kóterilýi baıqalady, ShQO-nyń keıbir ózenderi kemerinen asyp, sý basýy múmkin. Qazaqstannyń jazyqtyqtaǵy aýmaqtaryndaǵy ózenderdiń gıdrologııalyq rejıminde aıtarlyqtaı ózgerister kútilmeıdi.
