QR Munaı jáne gaz mınıstrligi janarmaı baǵasyn talqylamaq

Bul týraly búgin atalǵan vedomstvonyń basshysy Saat Myńbaev Úkimettiń selektorlyq formattaǵy otyrysynan keıin BAQ ókilderine suhbat bergen kezde aıtty.

Onyń atap ótýinshe, qazirgi ýaqytta elimizde dızel otyny men AI-80 markaly benzınniń baǵasy Munaı jáne gaz mınıstrligi men Tabıǵı monopolııalardy retteý agenttigi birlesip belgilegen shekte qalyptasyp otyr. Naryqtaǵy atalǵan ónimderdiń baǵasy dızel otynyna 82 teńgeni, AI-80-ge 80 teńgeni quraıdy. Sonymen qatar aýyl sharýashylyǵy taýarlaryn óndirýshilerge janarmaı 100 paıyz jetkizilgen. Onyń baǵasy Úkimet bekitken shekti normadan tómen.

Janarmaı naryǵynda aıtarlyqtaı másele týyndap otyrmaǵandyǵyn atap ótken mınıstrdiń paıymynsha, degenmen AI-92, AI-93 benzın markalary boıynsha túıtkildi jaıttar bolýy múmkin. «Biz reseılik munaı jetkizilimin esepke alǵannyń ózinde bul benzındi ózimizde 100 paıyz óndirmeımiz. Qazirgi ýaqytta Reseıde AI-92 markaly benzın 125 teńge, bizde 99 teńge kóleminde. Aradaǵy 25 paıyz úlken aıyrmashylyq. Sondyqtan bul máseleni búgin-erteń talqylaımyz» - dedi S.Myńbaev.