QR Munaı jáne gaz mınıstri elimizdi munaı ónimderimen tolyq qamtamasyz etýdiń merzimin aıtty

ASTANA. 17 qyrkúıek. QazAqparat - Qazaqstandy janar-jaǵarmaımen tolyq qamtamasyz etý 2020 jylǵa qaraı bolmaq. Bul týraly búgin Úkimet otyrysynan keıin QR Munaı jáne gaz mınıstri Uzaqbaı Qarabalın atap ótti.

«Elimizdi munaı ónimderimen tolyq qamtamasyz etý 2020 jylǵa qaraı bolady dep otyrmyz. Sebebi Qazaqstannyń qazirgi munaı óńdeý zaýyttaryn jańadan qaıta qurý jumystary júrýde, ıaǵnı 2016-2017 jyldarǵa qaraı barlyq jobalar iske qosylady. Sodan keıin bizdiń munaıdyń sapasyn eskere otyryp, «Eýro-4», «Eýro-5» standarttaryna jetkizip, jaqsy ónim alýǵa bolady dep esepteımiz», - dedi mınıstr.

Onyń sózine qaraǵanda, munaıdyń bıylǵy jylǵa josparlanyp otyrǵan mólsheri 82 mln. tonnany quraıdy. Іshki naryqta bir jyldyń ishinde munaı óńdeý zaýyttarynyń qarqyny 14 mln. tonnanyń shamasynda, al qalǵany eksportqa baǵyttalady.

Esterińizge sala keteıik, búginde elimizde Atyraý, Pavlodar jáne Shymkent munaı óńdeý zaýyttary bar.