QR MSM Sport jáne dene shynyqtyrý komıteti tóraǵasynyń orynbasarlary taǵaıyndaldy

ASTANA. QazAqparat - Búgin Ashat Seısenbekov pen Asqar Esimov QR Mádenıet jáne sport mınıstrligi Sport jáne dene shynyqtyrý komıteti tóraǵasynyń orynbasarlary bolyp taǵaıyndaldy. Bul týraly mınıstrliktiń alqa otyrysynda málim boldy.

QR Mádenıet jáne sport mınıstri Arystanbek Muhamedıulynyń aıtýynsha, Ashat Seısenbekov uzaq ýaqyttan beri sport salasynda qyzmet etip keledi. Ol VII qysqy Azııa oıyndary dırektsııasyn basqardy, bas qaýymdastyq prezıdentiniń keńesshisi boldy, Týrızm jáne sport mınıstriniń keńesshisi qyzmetin atqardy. Buǵan deıin «Astana EKSPO» ulttyq kompanııasynyń bas menedjeri boldy.

Asqar Esimov te kóp jyldar boıy sport salasynda eńbek etken jan.

«Taǵaıyndaýǵa deıin Asqar Esimov Azııa oıyndarynda úlken jetistikke jetken «Qaıyq» federatsııasynyń vıtse-prezıdenti bolǵan. El sportynyń damýyna qosqan úlesin eskere otyryp, biz ony osy laýazymǵa taǵaıyndadyq», - dedi A.Muhamedıuly.

Aıta keteıik, alqa otyrysynda Inchhondaǵy XVII jazǵy Azııa oıyndarynyń jáne Nankındegi ІІ jasóspirimder arasyndaǵy Olımpıada oıyndarynyń qorytyndylary talqylanyp, 2016 jyly Rıo-de-Janeıro qalasynda ótetin Olımpıadaǵa jáne 2017 jyly Almatyda ótetin XXVII qysqy Ýnıversıadaǵa daıyndyq máseleleri talqylandy.

Keńeıtilgen alqa otyrysyna QR Parlamenti Májilisiniń depýtaty Temirhan Dosmuhambetov qatysty.