QR MSM-niń laýazymdy qyzmetkerleri qandaı kúdikke ilindi
ASTANA. QazAqparat - Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Janna Bastarova QR Mádenıet jáne sport mınıstrliginiń jaýapty hatshysy men Ákimshilik departamenttiń dırektory qandaı kúdikke ilingenin aıtty, dep habarlaıdy QazAqparat tilshisi.
«Sybaılas jemqorlyqqa qarsy is-qımyl Ulttyq bıýrosy Mádenıet jáne sport mınıstrliginiń jaýapty hatshysy men Ákimshilik departamenttiń dırektoryna qatysty sotqa deıingi tergeý amaldaryn júrgizýde. Olar merdigerlik uıym basshysynan memlekettik satyp alý shartyn jasasqany jáne jalpy qamqorlyǵy úshin para aldy degen kúdikke ilingen. Sot sanktsııasymen departament dırektory úıqamaqqa alyndy. Sot jaýapty hatshyǵa qatysty 6 mıllıon teńge kóleminde kepil bekitti. Sonymen qatar, sońǵysy atqaryp otyrǵan laýazymynan ýaqytsha shettetildi. Tergeý jalǵasýda», - dedi Janna Bastarova búgingi brıfıngte.
Eske sala ketsek, Mádenıet jáne sport mınıstrligi Ákimshilik departamentiniń dırektory Erenaı Dárjibaev úıqamaqqa alynǵanyn buǵan deıin habarlaǵan bolatynbyz.
