QR men QHR qazaqstandyq jobalar úshin 300 mln dollarlyq qor qurady

««Qazyna Kapıtal Menedjmentte» Citic Kazyna Investment Fund I qory aıasynda qytaılyq seriktestermen birlesken tájirıbe bar. Ol qor arqyly Qazaqstan aýmaǵynda ornalasqan quny 100 mln AQSh dollarlyq 5 joba qarjylandyrylǵan. Ol - elektr energııasy men temir jol keshenderine qatysty ınfraqurylymdyq jobalar. Biz 2017 jyldyń sońyna deıin 300 mln dollarlyq birlesken qor qurýdy josparlap otyr. Ol boıynsha alǵashqy joba kelesi jyly qarjylandyrylatyn bolady. Bul Qazaqstandaǵy private equity naryǵynyń damýyndaǵy  ««Qazyna Kapıtal Menedjmenttiń» jasaǵan taǵy bir qadamy bolǵaly otyr», - deıdi QKM basqarma tóraǵasy Asqar Dostııarov  «Báıterek» Ulttyq Basqarýshy Holdıngi» delegatsııasynyń Beıjińge jasaǵan sapary barysynda.
 

Asqar Dostııarovtyń aıtýynsha, jańa qordyń qurylýy Qytaı holdıngteri men Gonkongtyń jeke kompanııalary úshin Qazaqstandy ınvestıtsııalyq turǵydan tartymdy el retinde tanyta túsedi.

«Otandyq kásiporyndar úshin bul qosymsha qarjy kózi retinde bolady», - deıdi kompanııa basshysy.

Asqan Dostııarov óz sózinde birlesken qordy qurýda Beıjińde sońǵy jumystar júrgizilip jatqanyn atap ótti. Qordyń qatysýshylary «Qazyna Kapıtal Menedjment», CITIC Group Corporation, Qytaı-eýrazııalyq ekonomıkalyq seriktestik qory men Asia Investment Finance Group bolmaq. Sonymen birge, ol qordyń Qazaqstan aýmaǵyndaǵy energetıka, aýyl sharýashylyǵy, logıstıka, ınfraqurylymdyq qurylys, jańa urpaqtyń aqparattyq tehnologııalary men joǵary tehnologııaly óndiris salalaryndaǵy jobalardy qoldaýǵa baǵyttalǵan.
 

Sapar barysynda qazaqstandyq delegatsııa Azııalyq ınvestıtsııalyq-qarjylyq CITIC Securities tobymen kelissózderdi júrgizý úshin Gonkongqa barýdy josparlap otyr. Ol kezdesýde qazaqstandyq delegatsııa Gonkong qor bırjasymen keıbir qazaqstandyq kompanııalardy IPO-ǵa ótkizý boıynsha seriktese atqaratyn jumystardy talqylamaq.