QR Memlekettik kúzet qyzmetiniń «Sardar» komandasy Dýbaıda ótken halyqaralyq jarysta qola júlde aldy
ASTANA. KAZINFORM - QR Memlekettik kúzet qyzmetiniń «Sardar» komandasy 3-7 aqpan aralyǵynda Birikken Arab Ámirlikteriniń Dýbaı qalasynda ótken UAE SWAT Challenge 2024 halyqaralyq saıysynda qola júlde jeńip aldy.
Bul týraly QR Memlekettik kúzet qyzmetiniń baspasóz qyzmeti habarlady.
«Táýelsiz Qazaqstan tarıhynda tuńǵysh ret elimizdiń arnaýly bólimshesiniń komandasy aıtýly halyqaralyq saıysta jeńiske jetti. Búkil álemnen jınalǵan 80-nen astam komandany basyp ozǵan «SARDAR» tek saıys qojaıyndaryna - Dýbaı qalasy polıtsııasynyń eki komandasyna ǵana jol berdi»,-delingen habarlamada.
UAE SWAT Challenge – kúshtik qurylymdardyń arnaýly maqsattaǵy bólimsheleri arasyndaǵy chempıonat. Bıyl saıys besinshi ret ótkizildi, oǵan búkil álemnen kelgen komandalar qatysyp, kedergilerden ótý, shabýylmen basyp alý, kepilge alynǵandardy qutqarý, jaralylardy evakýatsııalaý, qarý túrlerinen atý sekildi kúrdeli synaqtardan ótti.
Saıystyń barlyq kezeńderinde «SARDAR» úzdik taktıkalyq daǵdylar, kúsh-qýat, tózimdilik pen bıik rýhyn tanytty. Úshinshi jáne tórtinshi kúndegi nátıjeler boıynsha komanda saıystyń úzdik úshtiginen senimdi oryn aldy.
Chempıonattyń besinshi, sheshýshi kezeńinde de «SARDAR» joǵary arnaýly jáne taktıkalyq ázirligin jáne myqty komandalyq rýhyn kórsetti.
«QR Memlekettik kúzet qyzmeti komandasynyń jarqyn jeńisi - elimizdiń arnaýly memlekettik organy jeke quramynyń kúsheıtilgen úzdiksiz daıyndyǵynyń, memlekettiń órkendeýine jáne onyń qaýipsizdigin saqtaýǵa baǵyttalǵan patrıottyq tárbıesiniń jemisi. Saıystyń sońǵy «Kedergiler jolaǵy» kezeńinde oınatylǵan QR Memlekettik kúzet qyzmeti jeke quramynyń jańa ánurany - «Rýh» áýeni de komanda múshelerin jeńiske jetelegeni anyq!»,-dep jazdy baspasóz qyzmeti.
