QR Memlekettik rámizder saıty ashylady

Bul týraly atalǵan joba avtorlarynyń biri - Jandos Qurmanbaev aqparattyq agenttikterdiń birine habarlady.

Jobanyń negizgi maqsaty - Internet tutynýshylarǵa QR Memlekettik rámizderi týraly shynaıy aqparatty, sondaı-aq sapaly sýret pen aýdıojazbalardy usyný. Qazaq, orys jáne aǵylshyn tilderinde iske qosylatyn jańa saıtta qalalardyń eltańbalary men Qazaqstandaǵy barlyq áskerı kúshterdiń týlaryn da ornalastyrý josparlanyp otyr.   

«Biz Ánurannyń birneshe nusqasyn ázirleýdi kózdep otyrmyz. Onyń ishinde qysqa, uzaq, sózimen jáne sózzsiz aýdıojazba bolýy tıis. Árıne, ol úshin fılarmonııa, ıa bolmasa, orkestrdiń kómegi qajet bolady», - deıdi J.Qurmanbaev.

Jańa jobany iske asyrý úshin shamamen 7 mln. teńge qajet. Búginde aqsha jaǵynan kómektesýge daıar azamattar da bar kórinedi.