QR Memlekettik rámizder kúnine oraı Astanada velojarys ótedi

ASTANA. QazAqparat - 3 maýsym kúni elordada Astana qalasy ákimdigi, Astana qalasynyń Dene shynyqtyrý jáne sport basqarmasy jáne Astana qalasy ákimdiginiń «Sporttyq-buqaralyq is-sharalardy ótkizý dırektsııasy» KMM QR memlekettik rámizder kúnine oraı velojúgiris uıymdastyrýda, dep habarlady Astana qalasy ákimdiginiń Dene shynyqtyrý jáne sport basqarmasynyń baspasóz qyzmeti.

Atalǵan is-shara jyl saıyn ótkiziledi jáne kásibı jáne áýesqoı velosportpen aınalysatyn 2500-den asa adamdy jınaıdy. Velojúgiris qatysýshylary 10 km 500 m qashyqtyqty Qabanbaı dańǵyly boıymen ary qaraı Qorǵaljyń tasjoly, Turan dańǵylyn júrip ótip, «Astana-Arena» stadıony aldyna kelip toqtaıdy. Jyl saıyn velojúgiristi sportshylar, qoǵam qaıratkerleri, tanymal tulǵalar qoldap, is-sharaǵa qatysady.

Birinshi velojúgiris 20 mamyr kúni EXPO -2017 Halyqaralyq kórmesin qoldaý maqsatymen velomaýsymynyń ashylý qarsańynda ótkizildi. Keıin áýesqoı velosport ókilderiniń ótinishi boıynsha, Astana qalasy ákimdiginiń bastaýymen Astana qalasynyń Dene shynyqtyrý jáne sport basqarmasy jáne Astana qalasy ákimdiginiń «Sporttyq-buqaralyq is-sharalardy ótkizý dırektsııasy» KMM atalǵan sharany uıymdastyrýda.

Qatysýshylardy tirkeý 8-00-de, velojúgiris ýaqyty saǵat 9-00-da Qabanbaı batyr kóshesi, «Astana-Arena» stadıony aldynda bastalady. Velojúgiris kezinde joǵaryda atalǵan kósheler jabylady.

Shara aıaqtalǵan soń uıymdastyrýshylar tirkeý nómirleri boıynsha utys oıynyn ótkizedi.