QR Memlekettik ortalyq murajaıynyń jádigerleri táýelsizdik jyldary 10 myńnan astam arheologııalyq jádigermen tolyqty
ALMATY. 11 mamyr. QazAqparat - Shyǵys Qazaqstandaǵy Shilikti obasynan tabylǵan altyn buıymdar Almatydaǵy QR Ortalyq memlekettik murajaıynda saqtaýly tur.
Bul týraly murajaıdyń arheologııalyq ortalyǵynyń jetekshisi Mastýra Satybaldıeva búgin QazAqparat tilshisimen bolǵan suhbat kezinde aıtty.
«Bizdiń arheologııalyq qorǵa Qazaqstan aýmaǵynda júrgizilgen arheologııalyq zertteýler men qazba jumystary kezinde tabylǵan materıaldar ótkizilip otyrady. Máselen, sońǵy jyldary bizge Joldasbek Qurmanqulov Aral boıy saqtarynyń mádenıetine qatysty dúnıelerin tapsyrdy. Ábdesh Tóleýbaev Shyǵys Qazaqstandaǵy Shilikti taýly aýmaǵyndaǵy Saq qorymdarynan tabylyp, jurtshylyq arasynda «ekinshi saq altyn adamy» atalyp ketken jádigerdi ótkizdi, al Zeınolla Samashev Batys Qazaqsandaǵy zertteý materıaldaryn berdi», - deıdi M.Satybaldıeva. Onyń aıtýynsha, 1969 jyl Esik obalarynan tabylǵan «alǵashqy saq altyn adamy» bul murajaıda emes. Aımaqtarda tabylǵan zattar ony saqtaýǵa jáne ǵylymı aınalymǵa engizý múmkinshiligi bolǵan jaǵdaıda arheologtar ony jergilikti murajaılarǵa ótkizýge tyrysady. Mastýra Satybaldıeva: «Qazir jalpy qordaǵy jádigerlerdiń sany 300 myńnan asady. Murajaı qorynyń arheologııalyq ortalyǵynyń ózi táýelsizdik jyldary 10 myńnan astam jádigermen tolyqty. Buryn keńestik dáýirde el arasynda saqtalyp qalǵan keıbir qundy buıymdardy satyp alýǵa bıýdjetten arnaıy qarjy bólinetin. Qazir bul úrdis toqtap qaldy. Sondyqtan bul máseleni óz shamamyzǵa qaraı óz kúshimizben sheship jatyrmyz. Málelen el aýmaǵynda arheologııalyq qazba jumystaryn júrgizýge murajaıdyń ruqsat qaǵazy bar», - degendi aıtyp otyr.
