QR Memlekettik kúzet qyzmetiniń sarbazy Rım Papasy Frantsıskpen kezdesti

NUR-SULTAN. QazAqparat - Qazaqstan Respýblıkasy Memlekettik kúzet qyzmeti Aıryqsha maqsattaǵy kúshteri 0112 áskerı bóliminiń merzimdi qyzmet sarbazy Nıkolaı Vaınberger Álemdik jáne dástúrli dinder lıderleriniń VII sezi kezinde Rım Papasy Frantsısktiń qabyldaýynda boldy.

Bul týraly QazAqparat QR Memlekettik kúzet qyzmetiniń resmı saıtyna silteme jasap habarlaıdy.

Pontıfık áskerı qyzmetshige memleket qaýipsizdigin qorǵaýǵa qatysatyny úshin alǵys bildirip, batasyn berdi, oǵan jáne jaqyndaryna densaýlyq tilep, áskerı qyzmetin sapaly atqarýyna tilektestik bildirdi. Rım Papasy Nıkolaıǵa óziniń estelik medalin, krest syılap, qolyn qysty.

Katolıktik senimdegi Nıkolaı Vaınberger pontıfıkpen kezdesýin óz ómirindegi eń mańyzdy oqıǵalardyń biri dep sanaıdy.

«Maǵan osyndaı múmkindik berilgeni úshin alǵysym sheksiz», - deıdi ol.

Nıkolaı - Qostanaı oblysynyń týmasy, ol Aıryqsha maqsattaǵy kúshter qataryna 2022 jylǵy kóktemde shaqyrylǵan. Áskerı mindetine kiriskenine kóp ýaqyt óte qoımasa da, rásimdik sharalardy atqarýǵa qatysyp júr. Mysaly, ol elimizge keletin joǵary laýazymdy qonaqtardy áýejaıda kútip alatyn «qarsy alýshy sapta» turady. Komandırleri tarapynan Nıkolaı tártipti jáne jaýapty sarbaz retinde baǵalanady.

Ol otbasynda katolıktik senimniń dástúrlerin jáne keıbir salttaryn saqtaıtyndaryn aıtty.

«Árbir jeksenbi saıyn biz duǵa oqyp, ózimizge jáne jaqyndarymyzǵa densaýlyq pen jaıly ómir suraımyz, sonymen qatar, elimizde jáne álemde beıbitshilik bolýyn tileımiz», - dep syr bólisti Nıkolaı.

Nıkolaıdyń ata-anasy úshin balasynyń Qazaqstan Respýblıkasy Memlekettik kúzet qyzmeti qatarynda júrip Rım Papasynyń batasyn alýy – erekshe mańyzdy oqıǵa, al sarbazdyń ózi úshin bul erekshe jaıt áskerı qyzmet mindetterin aldaǵy ýaqytta da jaýapty jáne abyroıly atqarýǵa serpin bereri sózsiz.

Foto : gov.kz