QR Memlekettik hatshysy Ulttyq mýzeıdegi asyl metaldar qorymen tanysty

ASTANA. QazAqparat - QR Ulttyq mýzeıiniń asyl metaldar qorynda 40 myńnan astam altyn buıymdar jınaqtalǵan. Bul týraly búgin Astanada «QazAqparat» agenttigine bergen suhbatynda QR Ulttyq mýzeıi dırektorynyń qor qyzmeti boıynsha orynbasary Abaı Satybaldın málim etti.

«Búgin biz QR Memlekettik hatshysyna asyl metaldar qoryn kórsettik. Onda kúmisten jasalǵan 4 myńnan astam jádigerlik buıymdar bar, ıaǵnı osynda qazaqtar men Ortalyq Azııa halyqtarynyń áshekeıleri jınaqtalǵan. Sonymen qatar qorda 40 myńnan astam altyn buıymdar bar. Osynda negizinen ejelgi saqtar mádenıetiniń zattary, saq qorǵandarynan tabylǵan dúnıeler saqtalýda. Budan bólek, bizde Pavlodar, Ońtústik Qazaqstan, Jambyl oblystary aýmaǵynda sońǵy bes jylda arheologııalyq qazba jumystary kezinde tabylǵan qola dáýirindegi altyn buıymdar bar», - dedi A.Satybaldın. Aıta keteıik, búgin Memlekettik hatshy Gúlshara Ábdiqalyqova Qazaqstan Respýblıkasy Ulttyq mýzeıiniń jumysymen tanysty. Ulttyq mýzeı - Orta Azııa aımaǵy boıynsha teńdesi joq eń iri mýzeı. Arhıtektýralyq ólshemmen alǵanda, mýzeı ǵımaraty álemniń iri ekspozıtsııalary ondyǵynyń qatarynda tur. Qazirgi kezde mýzeıde 200 myńǵa jýyq eksponat bar, onyń 12 840-y ekspozıtsııada ornalastyrylǵan.