QR Memlekettik hatshysy: Qazaqstandaǵy isker áıelderdi qarjylaı qoldaý qajet

ASTANA. QazAqparat - Búgin Aqordada QR Memlekettik hatshysy Gúlshara Ábdiqalyqova Eýropalyq qaıta qurý jáne damý bankiniń vıtse-prezıdenti Elızabet Nelsonmen kezdesti, dep habarlaıdy QazAqparat. 

«Eýropalyq qaıta qurý jáne damý bankimen tyǵyz qarym-qatynasta jumys istep jatqanymyz belgili. 1993 jyldan beri Qazaqstanda EQQDB jalpy quny 7 mlrd AQSh dollarynan astam somaǵa 222 jobany qarjylandyrdy. Osy oraıda jaqynda Qyzylorda oblysynda, al osyǵan deıin Almaty oblysynda bolyp, energetıka men ınfraqurylym salasynda aýqymdy sharalar iske asyrylyp jatqanyn kórdim»,-dep toqtaldy G. Ábdiqalyqova.
Sonymen qatar kezdesý barysynda genderlik teńdik pen túrli salalarda áıelderdiń rólin arttyrý máselesi de áńgimege arqaý boldy.
«Búginde áıelderge túrli deńgeıde qoldaý jasalyp jatyr. Osy oraıda óz isin bastaýǵa nıetti názik jandylarǵa, ásirese aýyldyq jerlerege qarjy bólinýde»,-dedi Memlekettik hatshy.

Budan bólek, QR Úkimeti men EQQDB arasyndaǵy kelisim boıynsha «Bıznestegi áıelder» jobasy iske asyrylyp jatqany atalyp ótti. Búginde 7 myńnan astam shaǵyn jáne orta bıznes sýbektilerine 5,8 mlrd teńge qaryz berildi.

Kezdesý sońynda 31 tamyz ben 1 qyrkúıek aralyǵynda Astanada ótetin «Áıelder bolashaqtyń energııasyn qoldaıdy» atty halyqaralyq forýmda qarastyrylatyn balamaly energetıka men «jasyl» ekonomıkanyń, ornyqty jáne ınklıýzıvti ósimdi qamtamasyz etýdiń ózekti máseleleri talqylandy.

«Atap aıtqanda, «Áıelder bolashaqtyń energııasyn qoldaıdy» halyqaralyq forýmynyń daıyndyq jumystaryna belsendi túrde qatysyp jatqanyńyzǵa alǵysymdy aıtamyn»,-dedi Gúlshara Ábdiqalyqova EQQDB vıtse-prezıdentine qaratyp aıtqan sózinde.

Atalǵan forýmǵa saıasatkerler, «jasyl» ekonomıka men balamaly energetıka salasyndaǵy kóshbasshylar, memlekettik organdardyń, qazaqstandyq áıelder qaǵamdastyǵynyń ókilderi qatysady dep kútilýde.