QR Memlekettik hatshysy Halyqaralyq dzıýdo federatsııasynyń prezıdentin qabyldady (FOTO)

ASTANA. QazAqparat - Búgin Aqordada QR Memlekettik hatshysy Gúlshara Ábdiqalyqova Halyqaralyq dzıýdo federatsııasynyń prezıdenti Marıýs Vızerdi qabyldady.

Memlekettik hatshy bıylǵy 24-30 tamyz aralyǵynda elordada ótetin álem chempıonatynyń ıesi retinde Qazaqstanǵa tańdaý jasaǵany úshin Halyqaralyq dzıýdo federatsııasyna alǵysyn bildirdi. «Elimizde sportqa aıryqsha nazar aýdarylyp otyr. Elbasymyz jyl saıyn úlken aýqymdaǵy jańa sporttyq nysandardyń ashylýyna erekshe mán berýde. Atap aıtqanda, elimizde álemdik deńgeıdegi sporttyq sharalar ótkizilýde jáne sporttyń barlyq túrleri boıynsha daıyndyqtar júrip jatyr»,-dedi G. Ábdiqalyqova. Memlekettik hatshy respýblıkada 80 myńnan astam adam dzıýdomen turaqty túrde aınalysyp júrgendigin, sportshylardyń sheberligin jetildirý úshin barlyq qajetti jaǵdaılar jasalyp otyrǵandyǵyn, osy oraıda búginde Qazaqstanda álemdik dodalarda jeńimpaz bolǵan sportshylar qatary ósip kele jatqandyǵyn atap ótti. Kezdesý barysynda Qazaqstannyń Halyqaralyq dzıýdo federatsııasymen ózara is-qımylynyń jáne sporttyń osy túriniń respýblıkamyzda damý kelesheginiń ózekti máseleleri talqylandy. Aıta keteıik, Astanada ótetin álemdik birinshilikte 140 elden 900-den astam sportshy qatysady dep kútilýde. Erler men áıelder arasynda 7 salmaq dárejesi boıynsha 14 medal jıyntyǵy sarapqa salynady.