QR Memqyzmet ister agenttiginiń bos jumys oryndaryna 7 adam qabyldandy, taǵy osynshasy rezervke alyndy
ASTANA. 11 qyrkúıek. QazAqparat - 4-8 qyrkúıek kúnderi Memlekettik qyzmet isteri agenttiginde ákimshilik memlekettik 7 bos laýazym úshin konkýrstyq irikteý ótti.
Bul týraly agenttiktiń baspasóz qyzmetinen málim etti.
Baıqaý barysyn 16 qoǵam ókili, onyń ishinde QR Parlamentiniń depýtattary men jýrnalıster baqylady.
Baıqaýǵa Astana, Almaty qalalarynan jáne respýblıkanyń 12 oblysynan 161 adam qatysty. Bir bos laýazymǵa ortasha alǵanda 40 adamnan, keıbir oryndarǵa 66 adamnan keldi. Olardyń deniniń (69 %) zańgerlik jáne ekonomıkalyq bilimi bar. Úmitkerlerdiń 34 paıyzy 28 jasqa deıingi jastar. Qatysýshylardyń úshten ekisi - er azamattar.
Qatysýshylardyń 22 paıyzy - memlekettik qyzmetkerler. Olardyń úshten bir bóliginiń 10 jyldan 20 jylǵa deıingi eńbek ótili bar, al olardyń shamamen 30 paıyzy memlekettik qyzmet salasynda 10 jylǵa deıin eńbek etken.
Qazaqstan Respýblıkasy memlekettik qyzmetiniń jańa modeliniń Tujyrymdamasyna sáıkes, Agenttik zańnamany, onyń ishinde konkýrstyq irikteýdiń ashyqtyǵy men obektıvtiligin arttyrý máselelerin qamtıtyn zańdardy jetildirý boıynsha da jumystardy atqarýda. Osyǵan oraı Agenttik jumysty ózinen bastap, konkýrs kezindegi jańa tásilderdi aldymen synap kórýde.
QR Parlament depýtattary, qoǵam jáne BAQ ókilderine konkýrstyq irikteýdiń qorytyndy kezeńi - áńgimelesýge baqylaýshy retinde qatysý múmkindigi berildi. Olar memlekettik qyzmetkerlerdi irikteýdiń osyndaı tásilin oń baǵalaı otyryp, osyndaı tájirıbeni basqa memlekettik organdarǵa engizý jóninde usynys bildirdi.
